رووداو دیجیتاڵ
بڕیارە فێستیڤاڵی گوێزی هەورامان لە ناحیەی خورماڵ بەڕێوەبچێت. سەرپەرشتیاری فێستیڤاڵەکە دەڵێت، جگە لە گوێزی هەورامان، بەرهەمی کشتوکاڵی و باخداری و خواردەمەنییەکانی هەورامانی باشوور و رۆژهەڵاتی کوردستان تێیدا دەخرێنەڕوو و بۆ ماوەی سێ رۆژ بەردەوام دەبێت.
رۆژی شەممە 16ی ئەیلوولی 2023 سرووش سازانی، سەرپەرشتیاری یەکەمین فێستیڤاڵی گوێزی هەورامان بە تۆڕی میدیایی رووداوی گوت، "فێستیڤاڵەکە بۆ بەبازاڕکردنی بەرهەمە کشتوکاڵی و باخدارییەکانی هەورامانە و لە 12ی ئۆکتۆبەر لە خورماڵ دەستپێدەکات و بۆ ماوەی سێ رۆژ بەردەوام دەبێت."
گوێز بەرهەمی سەرەکیی فێستیڤاڵەکەیە. سرووشت سازانی گوتی، لە فێستیڤاڵەکەدا هەموو بەرهەمە کشتوکاڵی و باخدارییەکان و بەرهەمە دەستییەکانی هەورامان دەخرێنەڕوو.
سەرپەرشتیاری یەکەمین فێستیڤاڵی گوێزی هەورامان گوتی، "لە فێستیڤاڵەکەدا گۆرانی، هەڵپەڕکێ، شیعر، شانۆ، فەرهەنگ و ئەدەبیاتی هەورامان پێشکێشی ئامادەبووان دەکرێت."
فێستیڤاڵەکە لە ناحیەی خورماڵ لە پارێزگای هەڵەبجە بەڕێوەدەچێت و بە گوتەی سرووش سازانی، هاونیشتمانییانی هەورامانی باشووری کوردستان و رۆژهەڵاتی کوردستان تێیدا بەشدار دەبن. گوتیشی، "هەر ساڵە و فێستیڤاڵەکە دەبەینە ناوچەیەکی هەورامان؛ لە داهاتوودا دەیبەنە رۆژهەڵاتی کوردستانیش."
فێستیڤاڵەکە سێ رۆژ لە کاژێر 10:00ی بەیانی بۆ کاژێر 10:00ی شەو بەردەوام دەبێت. سەرپەرشتیارەکەی گوتی، هەوڵ دەدەن میوانانی دەرەوە بانگهێشت بکەن و ئامانجی سەرەکییان پەرەدانە بە کەرتی گەشتیاریی هەورامان و ناساندنی گوێزی هەورامان بە تەواوی بە عێراق و وڵاتانی ناوچەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ