هەڵەیەک روویدا! دووبارە هەوڵبدە
رووداو دیجیتاڵ
سەرچاوەیەک لە وەزارەتی دارایی هەرێمی کوردستان رایگەیاند، لیستی مووچە ئامادەیە و پارەکە بنێردرێت رادەگەیێنین.
رۆژی پێنجشەممە، 17ـی تەممووزی 2025، سەرچاوەیەک لە وەزارەتی دارایی هەرێمی کوردستان بە تۆڕی میدیایی رووداوی راگەیاند: "لیستی مووچە ئامادەیە، دوای ناردنی پارەکە بۆ سەر هەژماری بانکی ناوەندی لە هەرێمی کوردستان، لیستی مووچە رادەگەیێندرێت."
بە گوتەی ئەو سەرچاوەیە، تاوەکو ئێستا هیچیان پێنەگەیشتووە، دوای ئاگادارکردنەوەیان و ناردنی پارەکە دەست بە رێکارەکان دەکرێت.
هاوکات سەرچاوەیەکی باڵا لە کۆبوونەوەی ئەنجوومەنی وەزیرانی عێراق بە رووداوی گوت: "لە رۆژی یەکشەممەوە پارەکە دێت" .
هەر لەوبارەوە، هەڵکەوت عەزیز لە زاری سەرچاوەیەکی نێو ئەنجوومەنی وەزیرانی عێراقەوە رایگەیاند: "ئەمڕۆ ئەستەمە پارەکە بگاتە هەرێمی کوردستان، ناردنی پارەکە رەنگە بکەوێتە هەفتەی داهاتوو" .
خالید شوانی، وەزیری دادی عێراق رۆژی پێنجشەممە، 17ـی تەممووز لە کۆبوونەوەکەی ئەنجوومەنی وەزیرانی عێراق بەشدار بوو؛ بە هەڵکەوت عەزیز، بەرپرسی نووسینگەی رووداوی لە بەغدا گوت: "رێککەوتنی هەولێر و بەغدا ماوە درێژە و بەردەوام دەبێت، بەگوێرەی ئەو رێککەوتنە، هەرێمی کوردستان 120 ملیار دیناری مانگانە لە داهاتی نانەوتی بداتە فیدراڵ لەگەڵ 230 بەرمیل نەوتی رۆژانە" .
بەگوێرەی ئەو زانیارییانەی رووداو لە سەرچاوەکانی حکومەتی عێراق وەریگرتووە، رەشنووسەکە لەلایەن سەرکردەکانی بەغدا و هەولێر رەزامەندی لەسەر دراوە. "کێشەی لە بەردەم دروست نابێت".
رۆژی 28ـی ئایاری 2025 تەیف سامی، وەزیری دارایی عێراق نووسراوێکی ئاراستەی حکومەتی ھەرێمی کوردستان کرد و تێیدا ھاتبوو، "وەزارەت ناتوانێت لە ناردنی پارە بۆ ھەرێمی کوردستان بەردەوام بێت، بەھۆی تێپەڕاندنی پشکەکەی (12.67%) کە لە یاسای بودجەی فیدراڵیدا دیاریکراوە" .
دوایین جار، 13ـی ئایاری 2025، مووچەخۆرانی ھەرێمی کوردستان مووچەی مانگی نیسانیان وەرگرت، نزیکەی 80 رۆژە شایستە داراییەکانی مووچەخۆرانی ھەرێمی کوردستان دابەشنەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ