رووداو دیجیتاڵ
ئەمڕۆ تەرمی پیاوێک لە ژووری هۆتێلێکی زاخۆ دۆزرایەوە. پۆلیسی شارەکە دەڵێت، کەسەکە خەڵکی تورکیایە و تاوەکو ئێستا کەسوکاری نەهاتوون بۆ تەرمەکەی.
ئەمڕۆ هەینی 17-11-2023، رائید ئەحمەد رەمەزان، گوتەبێژی پۆلیسی زاخۆ بە تۆڕی میدیایی رووداوی گوت، "دوای ئاگادارکردنەوەمان لەلایەن کارگێڕیی هۆتێلێکەوە لەنێو شاری زاخۆ کە کەسێک لە ژوورەکەی نەهاتووەتە دەرەوە، تیمەکانی بەڵگە و تاوان چوونە شوێنی رووداوەکە و دەرکەوت کەسەکە لە ژوورەکەدا گیانی لەدەستداوە".
رائید ئەحمەد رەمەزان دەڵێت، کەسەکە خەڵکی تورکیایە و دوێنێ چووەتە هۆتێلەکە، دوای ئەوەی کە چووەتە ژوورەوە و نەهاتووەتە دەرەوە، ئێوارەی ئەمڕۆ کاژێر 16:00 پۆلیس ئاگادارکراوەتەوە. گوتەبێژی پۆلیسی زاخۆ گوتیشی، "هیچ شوێنەوارێکی برین و گولـلە لەسەر جەستەی کەسەکە نییە و گومانەکان هەموویان بەو ئاڕاستەیەن جەڵتە لێی دابێت، بەڵام بۆ دڵنیابوونەوە رەوانەی دادپزیشکی دهۆک کراوە".
گوتەبێژی پۆلیسی زاخۆ ئاماژەی بەوەشکرد، ئەو کەسەی گیانی لەدەستداوە خەڵکی ئیستەنبووڵە و ناوی ئیبراهیم ئۆزتورکە و تەمەنی 54 ساڵە؛ تاوەکو تەرمەکەی رەوانەی دادپزیشکی کراوە هیچ کەسوکارێکی نەهاتوون بۆ وەرگرتنەوەی تەرمەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ