رووداو دیجیتاڵ
جێگری سەرۆکوەزیرانی هەرێمی کوردستان سەرەخۆشی لە ماڵباتی ئەو سێ پێشمەرگەیە دەکات کە ئەمڕۆ لە خورماتوو شەهید بوون. دەشڵێت، "هێزەکانمان تۆڵەی خوێنی پیرۆزیان دەکەنەوە".
ئەمڕۆ یەکشەممە، 17-11-2024، قوباد تاڵەبانی، جێگری سەرۆکوەزیرانی هەرێمی کوردستان لە پرسەنامەیەکدا بۆ ماڵباتی ئەو پێشمەرگانە رایگەیاند، "لە دڵەوە سەرەخۆشی ئاراستەی بنەماڵە و کەسوکارە سەربەرزەکانیان و هاوسەنگەرانیان دەکەم و هیوای چاکبوونەوەی خێراش بۆ بریندارەکان دەخوازم".
پێشنیوەڕۆی ئەمڕۆ، لە قەزای خورماتوو بۆمبێکی چێندراو بە ئۆتۆمبێلی لیوایەکی هاوبهشی هێزەکانی پێشمهرگه و سوپاى عێراقدا تەقییەوە و بەهۆیەوە دوو فەرماندە و پاسەوانێکیان "شەهیدبوون" و سێ سەربازی دیکەش بریندار بوون.
ناوی ئەوانەی گیانیان لەدەستداوە بەمشێوەیەیە: عەقید روکن سامان سابر سلێمان، فەرماندەی فەوج، عەقید محەممەد رەزا کەریم، ئەفسەری ئەندازەی فیرقەی 9ـی سوپای عێراق و جێگری ملازم دوو، شەریف ئەحمەد محەممەدئەمین.
قوباد تاڵەبانی هەروەها دەڵێت، "وەک چۆن هەموو جارێک دوای شەهیدبوونی رۆڵەیەکی گەلەکەمان، پێشمەرگە و هێزە ئەمنییەکانمان گورزی کوشندە و جەرگبڕتر لە تیرۆریستان دەوەشێنن، بە دڵنیاییەوە دوای شەهیدبوونی ئەم سێ قارەمانەشمان، هێزەکانمان تۆڵەی خوێنی پیرۆزیان دەکەنەوە".
هەردی محەممەد، پەیامنێری رووداو چووە خورماتوو بۆ بەدواداچوونی رووداوەکە و ئاماژەی بەوە کرد، "رووداوەکە تائێستا بە لای وەزارەتی بەرگریی عێراق و وەزارەتی پێشمەرگەش گوماناوییە، لەبەرئەوەی تەرمەکان سووتاون، بۆیە گومان لە جۆری تەقینەوەکە هەیە."
پێشتریش سەرچاوەیەکی ئەمنی بە رووداوی راگەیاند: تەرمەکان لەسەر داوای وەزیری بەرگریی عێراق بە هێلیکۆپتەر رەوانەی بەغدا کراون و لەوێ توێکارییان بۆ دەکرێت، "دوای تەواوبوونی توێکاریش، سبەی یان دوو سبەی دەگەڕێندرێنەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ