رووداو دیجیتاڵ
حکومەتی ئێران بڕیاری گۆڕینی پارێزگاری سنەی دا و کوردێکی سوننەی خەڵکی ناوچەی هەورامانی وەکو پارێزگاری نوێی پارێزگاکە دیاریکرد.
فاتیمە مهاجرانی، گوتەبێژی حکومەتی ئێران ئەمڕۆ چوارشەممە رایگەیاند، لە کۆبوونەوەی ئەمڕۆی کابینەی حکومەتدا بڕیاری گۆڕینی هەردوو پارێزگاری سنە و کوهگیلۆیە و بویرئەحمەد درا و پارێزگاری نوێ بۆ ئەو دوو پارێزگایە دەستنیشان کران.
بە گوتەی فاتیمە مهاجرانی، لە کۆبوونەوەکەدا بڕیاردرا ئارەش لهۆنی، کە کوردێکی سوننە و خەڵکی ناوچەی هەورامانە، وەک پارێزگای نوێی سنە دەستنیشان بکرێت.
ئارەش لهۆنی لە شوێنی ئیسماعیل زارعی کوشا، پارێزگاری ئێستای سنە دەستبەکار دەبێت، کە کوردێکی شیعەیە و خەڵکی شاری قوروەی سەر بە پارێزگای سنەیە.
ئارەش لهۆنی، خەڵکی شاری پاوەی سەر بە پارێزگای کرماشانی رۆژهەڵاتی کوردستانە و نوێنەری شارەکانی پاوە، جوانڕۆ، سەلاسی باوەجانی و روانسەر بووە لە خولی یازدەیەمی پەرلەمانی ئێران.
ئیسماعیل زارعی کوشا لە 17-11-2021 و لە لایەن کابینەی ئیبراهیم رەئیسی، سەرۆککۆماری پێشووی ئێران وەک پارێزگاری سنە دیاریکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ