رووداو دیجیتاڵ
بەڕێوەبەری گشتیی دادپزیشکیی پارێزگای ورمێی رۆژهەڵاتی کوردستان دەڵێت، لە 7 مانگی رابردوودا 556 کەس لە سنووری پارێزگاکە بە رووداوی جیاوازی وەکو رووداوی هاتووچۆ، خنکان، سووتان و هەڵدێران گیانیان لەدەستداوە.
مووسا ئەدیب فەر، بەڕێوەبەری گشتیی دادپزیشکیی پارێزگای ورمێ رۆژی یەکشەممە 17ی تشرینی دووەم لەوبارەیەوە رایگەیاند، بەپێی ئەو ئامارانەی لەبەردەستیانە، لە ماوەی 7 مانگی رابردوودا 440 کەس لە پارێزگای ورمێ بە رووداوی هاتووچۆ گیانیان لەدەستداوە.
بەڕێوەبەری دادپزیشکیی ورمێ دەڵێت، لەو 7 مانگەدا 9010 دۆسیەی پشکنین بەهۆی رووداوەکانی هاتووچۆ لەو دامەزراوەیە تۆمار کراون، لەو ژمارەیە 6278 دۆسیە بۆ پیاوان و 2732 دۆسیەش بۆ ژنان کراونەتەوە.
بە گوتەی ئەدیب فەر، لەو ماوەیەدا 47 کەس بەهۆی هەڵدێران و کەوتنەخوارەوە، 38 کەس بەهۆی سووتان و 31 کەس بەهۆی خنکان لە پارێزگای ورمێ گیانیان لەدەستداوە.
ئاماژەشی بەوە کرد، لە سەرەتای ئەم ساڵی هەتاوییەوە تا کۆتایی مانگی حەوتەم، 19 هەزار و 346 دۆسیەی شەڕ و ئاژاوە لە دادپزیشکیی پارێزگاکە تۆمارکراون، کە 13 هەزار و 926 دۆسیەیان بۆ پیاوان و ئەوانی دیکە بۆ ژنان بووە.
بەڕێوەبەری گشتیی دادپزیشکیی پارێزگای ورمێ دەڵێت، لە ماوەی ئەو حەوت مانگەدا 197 دۆخی لەباربردنی یاسایی منداڵ لە لایەن دادپزیشکییەوە تۆمار کراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ