رووداو دیجیتاڵ
لەسەر داوای داواکاری گشتی، ئەمڕۆ دووشەممە پێنج کەس بە تۆمەتی هۆکاری مردنی ئەو ژنەی لە زاخۆ "بەهۆی وەرگرتنی خوێنی هەڵەوە" گیانی لەدەستدا، بانگهێشتی دادگە کران و سێیان زیندانی کران.
01ـی ئەم مانگە، هاونیشتمانییەک بەناوی شیلان ئیسماعیل بۆ ئەوەی منداڵی حەوتەمی ببێت، سەردانی نەخۆشخانەی ژنان و منداڵبوونی زاخۆی کرد. بە گوتەی ماڵباتەکەی، دوای وەرگرتنی خوێنی هەڵە، تەندروستی تێکچووە و دوای 17 رۆژ مانەوە گیانی لەدەستدا.
بەهۆی رووداوەکەوە تەندروستیی زاخۆ لیژنەیەکی لێکۆڵینەوەی پێکهێنا. هاوکات داواکاری گشتی سکاڵای تۆمار کرد، ئەمڕۆ پێنج کەس بانگێهێشتی دادگە کران.
غەریب مەجید، پەیامنێری رووداو کە بەدواداچوونی بۆ دۆسیەکە کردووە رایگەیاند، لەو پێنج کەسەی بانگهێشتی دادگە کرابوون، سێ کەسیان دەستگیرکراون و ئەوانی دیکە ئازاد کران.
پەیامنێری رووداو گوتی، ئەو سێ کەسەی زیندانیکراون یەکێکیان پزیشکی بێهۆشکاری شیلان بووە و یەکێکی دیکەیان هاوکاری بووە و ئەوی دیکەش کارمەندی تەندروستی بووە.
ئەو دوو کەسەی ئازادکراون بە دادوەریان گوتووە، کە ئەو رۆژەی رووداوەکە روویداوە ئەوان لە دەوامدا نەبوونە.
دادگەییکردنەکەی ئەمڕۆ نزیکەی حەوت کاژێر درێژەی کێشاوە. بەگوێرەی زانیاریی پەیامنێری رووداو، سبەی پێنج کەسی دیکە بۆ وەرگرتنی گوتە لێیان دەچنە دادگەی زاخۆ، لەنێویاندا ئەو پزیشکە هەیە، کە نەشتەرگەرییەکەی بۆ شیلان کردووە.
بێهۆشبوون و مردنی شیلان لە تۆڕە کۆمەڵایەتییەکان کاردانەوەی زۆری لێکەوتەوە و هاونیشتمانیان هاوسۆزییان بۆ ماڵباتەکەی دەربڕی.
پەیامنێری رووداو رایگەیاند، "ئەو کەسەی پسوولەی وەرگرتنی خوێنی بۆ شیلان پڕکردووەتەوە و داوای خوێنەکەی کردووە، تاوەکو ئێستا لە دۆسیەکەدا نادیارە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ