رووداو دیجیتاڵ
وەزارەتی بەرگریی تورکیا گیانلەدەستدانی 5 گەریلای پارتی کرێکارانی کوردستان (پەکەکە)ی لە هەرێمی کوردستان راگەیاند. هەپەگەش دەڵێت، 4 سەربازی سوپای تورکیایان کوشتووە و سەربازێکی دیکەشیان بریندار کردووە.
ئەمڕۆ هەینی 19ـی تەممووزی 2024، وەزارەتی بەرگریی تورکیا لە راگەیێندراوێکدا گیانلەدەستدانی 5 گەریلای پەکەکەی لە ئەنجامی بۆردوومانێک لەلایەن فڕۆکە جەنگییەکانیەوە لە چیای گارە لە سنووری پارێزگای دهۆک لە هەرێمی کوردستان راگەیاند.
وەزارەتی بەرگریی تورکیا دەڵێت، هەر لە بۆردوومانەکەدا 3 پێگەی پەکەکە لە گارە، زاپ و ئاڤاشین لە پارێزگای دهۆک بۆردوومانکراون کە کۆگای چەک و شوێنی مانەوەی گەریلاکان بوون.
ئەم راگەیێندراوە لە کاتێکدایە، رۆژی 16ـی مانگ، ناوەندی چاپەمەنی و راگەیاندنی هێزەکانی پاراستنی گەل (هەپەگە) کە باڵی سەربازیی پەکەکەیە، رایگەیاند، لە سنووری قەزای ئامێدی لە پارێزگای دهۆک شەڕ لەنێوان گەریلاکان و سەربازانی سوپای تورکیا روویداوە و لە ئەنجامدا 4 سەرباز کوژراون و سەربازێکی دیکەش برینداربووە.
ئەم شەڕ و پێکدادانە لە چوارچێوەی ئۆپەراسیۆنێکدایە، تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە هەرێمی کوردستان بۆ سەر پێگەکانی پەکەکە دەستیپێکرد.
بەڵام چەند هەفتەیەکە شەڕ و پێکدادانی نێوان هەردوولا لە پارێزگای دهۆک بەتایبەت لە سنووری قەزای ئامێدی زیادیکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ