هەڵەیەک روویدا! دووبارە هەوڵبدە
رووداو دیجیتاڵ
زیاتر لە دوو هەفتەیە بانگەشەی هەڵبژاردنی خولی شەشەمی پەرلەمانی عێراق دەستیپێکردووە، شارەوانیی پارێزگاکانی هەرێمی کوردستان دەڵێن: "هەر فلێکسێک بکەوێتە سەر شەقامەکان و رێگری لە هاتووچۆی خەڵک بکات، فڕێ دەدرێت."
بەگوێرەی رێنوێنییەکانی کۆمیسیۆنی باڵای سەربەخۆی هەڵبژاردنەکانی عێراق، بە هاوئاهەنگی لەگەڵ شارەوانی و لایەنە پەیوەندیدارەکان، ئەو شوێنانە دیاری کراون پۆستەری بانگەشەی هەڵبژاردنی تێدا هەڵدەواسرێت.
رۆژی یەکشەممە، 19ی تشرینی یەکەمی 2025، ژیار جەلال، بەڕێوەبەری ژینگەی هەولێر بە تۆڕی میدیایی رووداوی راگەیاند: "لیژنەکانمان هەموو رۆژێک بەنێو شەقام و شوێنە گشتییەکاندا دەگەڕێن، هەر فلێکسێک رێگەی گرتبێت و دڕابێت فڕێ دەدرێت، بۆیە پێویستە بەربژێران فلێکسەکان لە شوێنی گونجاو هەڵبواسن و ئاگاداریان بن، تاوەکو ئێستا چەندین فلێکسی کەوتوو فڕێدراون و بەردەوامیش دەبن."
هەفتەی رابردوو، شارەوانیی سلێمانی لایەن و لیستەکانی ئاگادارکردەوە، ئەو پۆستەر و فلێکسانە هەڵبگرن کە بەهۆی رەشەباوە کەوتوون.
زەردەشت رەفیق، گوتەبێژی شارەوانیی سلێمانی بە رووداوی راگەیاند: "تەنیا یەک جار بەهۆی رەشەباوە بەربژێر و لیستەکانمان ئاگادارکردووەتەوە، بەڵام لەمەودوا ئەو فلێکس و ئاڵایانەی دەکەونە سەر شەقام و کۆڵانەکان فڕێ دەدرێن و هەڵدەگیرێنەوە، بەڵام تاوەکو ئێستا هیچ شتێکی وا تۆمار نەکراوە."
136 بەربژێری تاک و نێو لیستەکان لە سنووری پارێزگای سلێمانی رکابەری لەسەر بەدەستهێنانی 17 کورسیی پشکی ئەو پارێزگایە بۆ پەرلەمانی عێراق دەکەن.
لە دهۆکیش شێروان حوسێن، بەرپرسی راگەیاندنی شارەوانیی پارێزگاکە بە رووداوی راگەیاند: "ئەو فڵێکسانەی نەشکاون هەڵیان دەگرینەوە، فڕێیان نادەین و لە کۆگاکانی شارەوانیی دایاندەنێین، تاوەکو خاوەنەکانیان بێن و هەڵیبواسنەوە، بەڵام ئەوانەی کەڵکیان نەماوە و زێدەڕۆییان تێدایە، فڕێ دەدرێن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ