رووداو دیجیتاڵ
فەرماندەیی هێزەکانی پاراستنی گەل - هەپەگە، ناسنامهی دوو گەریلای پارتی کرێکارانی کوردستان - پەکەکە ئاشكرا دهكات و دەڵێت، لە شهڕ و پێكدادانەکەی گەریلاکان لەگەڵ سەربازانی تورکیا لە بنکەی سەربازی لە ناوچەی زاپ لە هەرێمی کوردستان گیانیان لەدەستداوە.
ناوەندی راگەیاندن و چاپهمهنیی هێزەکانی پاراستنی گەل - هەپەگە ناسنامەی دوو گەریلای بڵاوکردەوە و دەڵێت، لە رۆژی 12ـی مانگدا و لە هێرشەکەی گەریلاکان بۆ سەر سەربازگەی سوپای تورکیا لە ناوچەی زاپ لە هەرێمی کوردستان گیانیان لەدەستداوە.
ناسنامەی گەریلاکان بەمشێوەیەیە؛ سەفا ئاڵتونئای ناسراو بە سەرخوەبوون سەرهاد کە لەدایکبووی ئاگری باکووری کوردستان و رۆنیجان حەمۆ ناسراو بە رزگار چاوڕەش کە لەدایکبووی کۆبانێی رۆژئاوای کوردستان بوون.
هاوکات ناوەندی چاپەمەنی و راگەیاندنی هەپەگە لە گرتەڤیدیۆیەکدا دیمەنی بەشێک لە شەڕ و پێکدادانەکانی گەریلاکان و هێرشکردنە سەر بنکەی سەربازی هێزەکانی تورکیای لە ناوچەی زاپ بڵاوکردەوە و تێیدا هاتووە، هێرشەکە لە سێ قۆڵەوە ئەنجامدرا و تێیدا لانیکەم 61 سەرباز کوژران و چوار سەربازیش بە سەختی بریندار بوون.
هەرچی سوپای تورکیایە، رۆژی 12ـی مانگ لە رێگەی وەزارەتی بەرگرییەوە سێ راگەیێندراوی یەک لەدوای یەکی بڵاوکردەوە و لە دوایین راگەیێندراودا باسی لە کوژرانی نۆ سەرباز و برینداربوونی چوار سەربازی دیکە و گیانلەدەستدانی 12 گەریلا کردووە.
دوای ئەو شەڕە، سوپای تورکیا دەستی بە بۆردوومانی چڕی پێگەکانی پەکەکە لە هەرێمی کوردستان و ژمارەیەک ئامانج لە رۆژئاوای کوردستان کرد و بەگوێرەی وەزارەتی بەرگری، لە ئەنجامی هێرشە ئاسمانییەکان 95 گەریلا و شەڕڤان گیانیان لەدەستدا.
بۆردوومانەکان زیانی گەورەیان بە کەرتە جیاوازەکانی رۆژئاوای کوردستان گەیاندووە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ