رووداو دیجیتاڵ
هەڵمەتی چاندنی هەشت هەزار نەمام لە هەولێر دەستیپێکرد. بەڕێوەبەری ئەندازەی پارکەکانی شارەکە دەڵێت، سەوزایی لە هەولێر 19.5%ـە و لە کۆتایی ئەمساڵدا دەیگەیێننە 20%.
رۆژی سێشەممە، 20ـی حوزەیرانی 2023، رێبین ئەحمەد، بەڕێوەبەری ئەندازەی پارکەکانی هەولێر بە تۆڕی میدیایی رووداوی گوت، ئەمڕۆ هەڵمەتێکی نەمام چاندنیان لە هەولێر دەستپێکردووە و لە ماوەی پێنج رۆژدا هەشت هەزار نەمام دەچێنن.
هەڵمەتەکە لە رێگەی هەولێر – مەخموورە و بە سێ ریز نەمامەکان دەچێندرێن؛ ئەملاولای رێگەکە و ناوەندی رێگەکە دەگرێتەوە و دارەکان لە جۆرەکانی (دار سیسم و دار دەدۆنیا)ن.
رێبین ئەحمەد دەڵێت، ئێستا سەوزایی لە سنووری هەولێر بەگوێرەی رووبەر 19.5%ـە و بە گوێرەی پلانەکانیان تاوەکو کۆتایی ئەمساڵ، دەیگەیێننە 20%.
بەگوێرەی ئاماری شارەوانیی هەولێر بۆ رووداو، ساڵی رابردوو 182 هەزار گوڵ و 121 هەزار درەخت چێندراون.
بەگوێرەی بەدواداچوونەکانی پێشتری رووداو، ئەمساڵ زاخۆ کەمترین سەوزایی هەبووە کە 3% و سەوزترین شاریش ئامێدی بووە کە 42%ـە. هەروەها لە شاری سلێمانی سەوزایی 12%، لە دهۆک 13.6%؛ لە هەڵەبجە 11%ـە؛ لە رانیە 5%ـە و لە قەڵادزێ 11٪ـە؛ لە سۆران 4% و لە کەلاریش 8.3%.
بەگوێرەی دەستەی ژینگەی هەرێمی کوردستان، کەمترین پێویستیی سەوزایی لە هەرشارێک دەبێت لانیکەم 15%بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ