وێنەی گەنجەکە.
رووداو دیجیتاڵ
ئەوەی لە سەرەتای ڤیدیۆکەدا دەردەکەوێت، گەڕان و پشکنینی هێزەکانی پێشمەرگەیە لە ناوچەی کانی ماسی لە کەلار، بەدوای گەنجێکدا دەگەڕێن کە چوار رۆژە بێسەروشوێنە.
مەهدی محەممەد تەمەن 25 ساڵ، دانیشتووی کەلاری کۆنە، ئێوارەی یەکشەممە دوای ئەوەی پەیوەندییەکی بۆ دێت، دەچێتە نزیک رووباری سیروان و لەوێوە دیارنامێنێت.
محەممەد خالید، باوکی مەهدی بە رووداوی راگەیاند: "نزیکەی کاژێر 04:35 خولەک دەچێتە چایخانەیەکەوە لە بازاڕ. ئیتر دەوروبەری ئەوکاتە بە ماتۆڕەکەیەوە دەردەچێت. ئیتر تەلەفونێ بۆ دێ. تەبعەن دەڕوا، لەودیو پردەکەی ساڵح ئاغاوە کە بازگەیەکی لەبەردەمە و جادەیەکی لێ جیادەبێتەوە بۆ کانی ماسی و ئەو ناوە، ئیتر لەوێ دیار نامێنێت."
مەهدی کوڕە گەورەی خێزانەکەیە، خوێندکاری قۆناخی چواری بەشی فیزیایە لە زانکۆی گەرمیان. جگە لە کەسوکاری، بۆ دۆزینەوەی، هێزەکانی پێشمەرگە دەستیان بە کێوماڵکردنی ناوچەکە کردووە.
جەلیل فایەق، فارماندەی هێزەکانی پێشمەرگە ئاماژەی بەوەکرد: "ئەم کوڕە راونراوە و گەیشتووەتە ئەم شوێنە. ئایا لەم شوێنە کەوتووەتە ئاوەکەوە، ئایا بە ئۆتۆمبێل گرتوویانە و بردوویانە، بەڵام ئێمە لە گەڕان بەردەوامین و کۆڵنادەین. هاوکاریان دەبین. ئیشەڵڵا تاوەکو ئەنجامی کۆتاییمان دەستدەکەوێت."
کەسوکاری مەهدی سکاڵایان لەسەر کەس تۆمار نەکردووە و تەنیا چاوەڕێی سەرەداوێکن بۆ دۆزینەوەی کوڕەکەیان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ