پاڵاوگەیەک لە ناوچەی کواشێ لە پارێزگای دهۆک
رووداو دیجیتاڵ
جێگری پارێزگاری دهۆک دەڵێت: "بەهۆی قورسیی مەرجەکانی وەزارەتی سامانە سرووشتییەکانەوە، هیچ پاڵاوگەیەکی کواشێ ناتوانێ دەست بە کارکردن بکاتەوە".
رۆژی سێشەممە، 21/1/2025، ماجید سەید ساڵح، جێگری پارێزگاری دهۆک لەکاتی بەشداریکردنی لە بووڵتەنی کاژێر 17:00ـی تۆڕی میدیایی رووداو گوتی: "دوای کۆبوونەوەی پارێزگاری دهۆک و لایەنە پەیوەندیدارەکان بۆ جێبەجێکردنی بڕیارەکانی پاراستنی ژینگە، رۆژی 13/1/2025 دەست بە جێبەجێکردنی بڕیارەکان کرا".
ماجید سەید ساڵح رایگەیاند: "رۆژی 13/01/2025 سەرجەم پاڵاوگەکانی ناوچەی پیشەسازی کواشێ داخران و ئاگادار کرانەوە کە تاوەکو رێنماییەکان جێبەجێ نەکەن، ناتوانن کار بکەن".
ماجید سەید ساڵ دەڵێت: "بە گشتی 15 پاڵاوگە لە دهۆک هەبوون کە سەرجەمیان داخراون و بەهۆی قورسبوونی رێنماییەکانەوە کەسیان ناتوانن دەست بە کارکردن بکەنەوە".
لە ساڵانی رابردوودا بە هۆی پێویستیی ئەو پارێزگایە بە نەوت و گاز و بەنزین، رێگە بە کارکردنی پاڵاوگەکانی ناوچەی پیشەسازیی کواشێ درا.
جێگری پارێزگاری دهۆک دەڵێت: "دهۆک پێویستی بە پاڵاوگەیەک هەیە و ئێمە وەک لایەنی کارگێڕی پشتگیری دامەزراندنی پاڵاوگەیەکی پێشکەوتوو دەکەین".
یەکێکی دیکە لە بڕیارەکانی حکومەتی هەرێمی کوردستان بۆ پاراستنی ژینگە تایبەت بوو بە موەلیدەکان کە پێویستە بێدەنگ بکرێن و فلتەری هەوا بەکاربێنن.
سەبارەت بە جێبەجێکردنی ئەم بڕیارە، جێگری پارێزگاری دهۆک دەڵێت: "لە دهۆک بە گشتی هەزار و 186 موەلیدە هەن. تەنیا لەنێو شاری دهۆک 383 موەلیدە هەن کە لەژێر چاودێریی لیژنەی موەلیدەکان، کارەبا دەدەنە هاونیشتمانییان".
جێگری پارێزگاری دهۆک گوتی: "هێشتا بڕیارەکانی تایبەت بە موەلیدەکان بە تەواوی جێبەجێنەکراون و ماوەی مانگێک دراوە بە خاوەنی موەلیدەکان کە ئەو بڕیارانە جێبەجێ بکەن و هەر خاوەن موەلیدەیەک پابەند نەبێت، سزا دەدرێت".
جێگری پارێزگاری دهۆک ئاماژەی بەوەشکرد: "هەر موەلیدەیەک ببێتەهۆی پیسکردنی ژینگە یان بێزارکردنی هاونیشتمانیان، لادەبرێت و کەسێکی دیکە دەتوانێت بە پێی رێنماییەکان موەلیدە دابنێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ