هەڵەیەک روویدا! دووبارە هەوڵبدە
هەولێر دیجیتاڵ
پێرێ چوار گەنجی دانیشتووی گەڕەکی فەرمانبەرانی هەولێر بۆ گەشت چوونە سەیرانگەکانی قەزای تەقتەق، دووانیان ئاو بردنی و بەرگریی شارستانیی کۆیە دەڵێت: "یەکێکیان رزگارکرا و ئەوەی دیکەشیان تائێستا نەدۆزراوەتەوە."
ئەمڕۆ یەکشەممە، 21-09-2025، عەمید گۆران ئەحمەد، بەڕێوەبەری بەرگریی شارستانیی کۆیە بە رووداوی گوت: "رۆژی هەینی تیمەکانمان لە رووداوێکی خنکان لە سنووری زێی بچووک ئاگادارکرانەوە، تیمەکانمان گەیشتنە شوێنەکە."
بە گوتەی بەڕێوەبەری بەرگریی شارستانیی کۆیە، دوو گەنج ئاو بردوونی، یەکێکیان لەلایەن خەڵکی ناوچەکەوە رزگارکراوە و ئەوەی دیکەش تاوەکو ئێستا تەرمەکەی نەدۆزراوەتەوە. تیمەکانیان سەرقاڵی گەڕان و دۆزینەوەی تەرمەکەن.
هەر ئەمڕۆ رێباز مەسعود، کوڕی خاڵی ئەو گەنجەی لە ئاوی تەقتەق خنکاوە بە رووداوی گوت: "پێری کوڕەخاڵەکەم لەگەڵ سێ گەنجی هاوڕێی روویان لە سەیرانگەکانی تەقتەق کردووە؛ چوونەتە پشت سەیرانگەکان و لەژێر پردی دووەم مەلەیان کردووە؛ رووبارەکە دوو لەو گەنجانەی بردووە."
ئەو گەنجەی خنکاوە ناوی سەبوور مزەفەر ئیسماعیل و تەمەنی 22 ساڵە، دانیشتووی گەڕەکی فەرمانبەرانی شاری هەولێر بوو. خوێندنی تەواو نەکردووە؛ ماوەیەک لەمەوبەر بە گرێبەست لە ئەنجوومەنی وەزیران دەوامی کردووە.
رێباز مەسعود گوتی، "سەبوور لە ماڵەوە چووەتە دەرەوە، دایک و باوکی پێیانگوتووە نەچێتە نێو ئاو. کاژێر 11:00ی پێشنیوەڕۆش دووبارە پەیوەندییان پێوە کردووەتەوە کە نابێت مەلە بکات، بەڵام کردوویەتی و ئاو بردی."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ