رووداو - هەولێر
سێ رۆژ دوای راگەیاندنی ئاگربەست لە رۆژاڤای كوردستان، ژەنەراڵ مەزڵووم كۆبانی، فەرماندەی هێزەكانی سووریای دیموكرات (هەسەدە) رایگەیاند كە توركیا ئاگربەستەكە جێبەجێ ناكات، داوای لە ئەمریكاش كرد بەڵێنی خۆی لەبارەی ئاگربەستەكە بەرێتەسەر. كۆبانی لە لێدوانێكدا بۆ ناوەندی (دیفێنس وان) دەڵێت هەسەدە لەگەڵ رووسیا و سووریا كار ناكات. لەبارەی پلانێكی هاوبەشی رووسیا و توركیاش هۆشداری دەدات.
بەگوێرەی راپۆرتێكی رۆژنامەی (وۆڵ ستریت جورناڵ)ی ئەمریكی، چەند رۆژێك پێش دەستپێكردنی هێرشی توركیا بۆ سەر ناوچە سنوورییەكانی رۆژئاڤای كوردستان، جەیمز جێفری، نێردەی تایبەتی سەرۆكی ئەمریكا لە هاوپەیمانێتیی نێودەوڵەتی دژی داعش، بە مەزڵووم كۆبانی گوتبوو ئەمریكا نایەوێ وەك ڤێتنامی بەسەر بێ و كاتی بۆ كشانەوە بەدەستەوە نەبێ.
كۆبانی لەبارەی دەرئەنجامی كشانەوەی هێزەكانی ئەمریكا لە سووریا بە (دیفێنس وان) دەڵێ: "دەمەوێ خەڵكی ئەمریكا ئاگادار بكەمەوە كە ئەوەی روودەدات زۆر خراپە و بەبەرچاوی ئیدارەی ئەمریكییەوە لەناوچوونی خەڵكی كوردی سووریا و پاكتاوی نەژادی لێدەكەوێتەوە".
كۆتایی هەفتەی رابردوو، مایك پێنس، جێگری سەرۆكی ئەمریكا، رێككەوتنی ئاگربەستێكی راگەیاند كە توركیا و هەسەدە پابەند دەكات بەوەی بۆ ماوەی 120 سەعات لە ناوچە سنوورییەكان شەڕ رابگرن، ئەوەش بۆ ئەوەی یەكینەكانی پاراستنی گەل (یەپەگە) كاتی ئەوەی بەدەستەوە بێ ئەو ناوچانە چۆڵ بكات. رێككەوتنەكە دوای ئەوە هات كە دۆناڵد ترەمپ، سەرۆكی ئەمریكا لە ژێر گوشاری كۆنگرێسدا بە جیا قسەی لەگەڵ رەجەب تەیب ئەردۆغان، سەرۆككۆماری توركیا و مەزڵووم كۆبانی كرد.
فەرماندە كوردەكە جەخت لەوە دەكاتەوە كە توركیا رێككەوتنە 13 خاڵییەكە جێبەجێ ناكات و ئامانجی دیكەی هەیە، بۆیە داوا لە ترەمپ دەكات "بەڵێنەكەی بەرێتەسەر". لە كاتێكدا بە گوتەی كۆبانی ژمارەی كوژراوانی هێزەكەی لە دوو رۆژی یەكەمی دوای رێككەوتنەكەدا زیاتر بووە لە رۆژانی پێش رێككەوتنە. 50 شەڕڤان بەهۆی هێرشی ئاسمانیی توركیاوە شەهید بوون و 100ی دیكەش بریندارن.
مەزڵووم كۆبانی لەبارەی پەیوەندییە تەلەفۆنییەكەی خۆی لەگەڵ ترەمپ و چاوەڕوانییەكانی لە كۆشكی سپی دەڵێ: "ئەو (واتە ترەمپ) پێیگوتم كە ئەوەی لەدەستی بێ دەیكات تاوەكو ئەو شەڕە رابگرێ، گوتی بەنیازە قسە لەگەڵ ئەردۆغان بكات، بڕواشم وایە هەندێك بەڵێنی لە ئەردۆغان وەرگرتووە، بەڵام ئەوەی ئێستا رووندەبێتەوە ئەوەیە كە ئەردۆغان گوێ بۆ ترەمپ ناگرێ و بەڵێنەكانی خۆی لەگەڵی ناباتەسەر. داوا لە ترەمپ دەكەم بەڵێنەكانی خۆی بەرێتەسەر و ئەو شەڕە رابگرێ".
لە بڕگەی یانزدەیەمی رێككەوتنی ئاگربەستەكەدا هاتووە: "لایەنی توركی ئۆپەراسیۆنی كانی ئاشتی رادەگرێ بۆ ئەوەی رێگە بە یەپەگە بدات لە ماوەی 120 سەعاتدا لە ناوچەی ئارام بكێشێتەوە".
كۆبانی رەتیدەكاتەوە توركیا پابەندی رێككەوتنەكە بووبێ و دەڵێ: "هێزەكانی توركیا هێرشێكی هەمەلایەنەیان كردووەتە سەر سەرێ كانی و خەڵك و شەڕڤانەكانمان لەناو شارەكەدا گەمارۆ دراون. ئێمە لەسەر ئەوە رێككەوتین كە كۆریدۆرێكی پارێزراو بكەینەوە بۆ ئەوەی خەڵك و هێزەكانمان بكشێنینەوە، بەڵام توركەكان رازی نین ئەو كۆریدۆرە بكەنەوە و گەمارۆكەی سەر شارەكەیان لانەداوە".
فەرماندەكەی هەسەدە پێیوایە توركیا بە ئەنقەست رێگە لە كشانەوەی هەسەدە دەگرێ و دەڵێ: "ئەوان (هێزەكانی توركیا) بۆ پێنج رۆژ درێژە بە كوشتاری ئێمە دەدەن، لە كۆتاییشدا دەڵێ ئەوەتا كوردەكان لە شارەكە نەكشاونەتەوە، ئینجا دەست بە پاكتاوی نەژادی دەكەن. ئەمەش لەبەرچاوی ئەمریكییەكان روودەدات".
پێناچێ نە ئیدارەی ترەمپ و نە فەرماندە مەیدانییەكانی ئەمریكا گوێیان لە كوشتاری مەدەنی بێ. بە گوێرەی راپۆرتەكەی (جورناڵ)، لە رۆژانی یەكەمی هێرشەكاندا، كاتێك توركیا ناوچەكانی دەوروبەری كۆبانییان كردبووە ئامانج، خەڵك بەرەو بنكەیەكی ئەمریكی نزیك لە شارەكە رایانكردبوو، چونكە پێیانوابوو ئەستەمە توركیا بنكەی سەربازیی ئەمریكا بكاتە ئامانج، بەڵام سەربازە ئەمریكییەكان خێزانەكانیان لەخۆیان دوورخستبووەوە.
لە رێككەوتنی ئاگربەستەكەدا باسی درێژیی سنووری ناوچەكە ناكرێ، ئەردۆغان جەخت لەوە دەكاتەوە كە هێزەكانیان هەتا قووڵایی 32 كیلۆمەتر دێنەژوورەوە. مەزڵووم كۆبانی لەبارەی قەبارەی ئەو ناوچەیەی رێككەوتنەكە دەیگرێتەوە دەڵێ: "ئێمە تەنیا لەسەر ئەوە رێككەوتووین لە سەرێ كانی و گرێ سپی بكشێینەوە و باسی ناوچەكانی دیكەمان نەكردووە، ناوچەكانی دیكە كوردین و ئەو خەڵكە هیچ شوێنێكیان نییە بۆی بچن، دەیانەوێ كورد روو لە كوێ بكات؟".
وجودی هێزەكانی ئەمریكا لە سووریا دەستی كوردی رۆژئاڤا بۆ دانوستاندن لەگەڵ توركیا بەهێز دەكات و رێگە خۆشدەكات بۆ ئەوەی كورد لە نووسینەوەی دەستووری نوێی سووریا و داڕشتنی سیستەمی سیاسیی ئەو وڵاتەدا كاریگەری هەبێ. فەرماندە كوردەكە هۆشداری دەدات كە "ئەگەر (هێزەكانی ئەمریكا) بەتەواوەتی لە سووریا بكشێنەوە، رووسەكان و توركەكان پێكەوە پلانەكەیان جێبەجێ دەكەن. ئەمەش هەموو ئەو شتانەی لەو پێنج ساڵە لەگەڵ ئەمریكییەكان بەدەستمان هێناوە تێكدەدات".
لەگەڵ بڵاوبوونەوەی هەواڵی كشانەوەی هێزەكانی ئەمریكا لە باكووری سووریا، هێزەكانی سووریای دیموكرات بە ناوبژیوانی رووسیا دەستیان بە دانوستاندن لەگەڵ حكومەتی سووریا كرد، لە چوارچێوەی رێككەوتنێكیشدا هێزەكانی رژێم لە كۆمەڵێك ناوچەی سنووریی رۆژئاڤای كوردستان جێگیر بوون، لەوانەش كۆبانی و منبج.
مەزڵووم كۆبانی دەڵێت: "ئەنجوومەنی سووریای دیموكرات (مەسەدە) كە باڵی سیاسی و ئیداریی هەسەدەیە، لە رۆژانی یەكەمی هێرشەكەدا روویان لە رووسیا و سووریا نا، بۆ ئەوەی لەمپەرێك بۆ هێرشی توركیا دابنێن" بەڵام دەشڵێت: "هەسەدە هیچ گفتوگۆیەكی لەگەڵ رووسیا و حكومەتی سووریا نەماوە".
مەزڵووم كۆبانێ لەوبارەیەوە بە (دیفێنس وان) دەڵێ: "ئەمریكا دەبێ پابەندی بەڵێنەكەی بێ و ئاگربەستەكە بسەپێنێ و دواتریش دەتوانن یارمەتیدەر بن بۆ ئەوەی چارەسەرێك بۆ پرسی كورد لە سووریا بدۆزرێتەوە. ئەگەر بگوترێ رووسەكان و سووریا یارمەتی كورد دەدەن، ئەوە قسەیەكی راست نییە. رووسەكان و رژێمی سووریا هەڵوێستێكی دوژمنكارانەیان بەرامبەر كورد هەیە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ