ئایدن مەعرووف: تورکیا لە بڕیارەکەی دادگەی فیدراڵی نیگەرانە

 

ئایدن مەعرووف، وەزیری هەرێم بۆ کاروباری پێکهاتەکان لە بەرنامەی نووڕۆژی رووداو باسی لە بڕیارەکە و کاریگەرییەکانی کرد، گوتی "هەموو لایەنەکان لەو بڕیارە نیگەرانن."

 

کاتێک پێشکێشکاری رووداو پرسیاری کرد، تورکیا نیگەرانە لەو بڕیارە، ئایدن مەعرووف گوتی، "بەڵێ تورکیا نیگەرانە."

 

 

لەبارەی نیگەرانیی لایەنەکانی هەرێمی کوردستان، ئەو وەزیرە گوتی، پارتی "زۆر نیگەرانە" و، رەنگە ئەمڕۆ هەڵوێستی هەبێت، بەڵام لەلایەن لایەنەکانی دیکەوە هیچ پەیامێکیان پێنەگەیشتووە. 

 

ئایدن مەعرووف باسی لەوەشکرد، قورسایی ژمارەی دەنگدەرانیان لە سەنتەری هەولێرە کە نزیکەی 400 هەزار تورکمان لە هەولێرن، بەڵام مەرج نییە هەموویان دەنگدەر بن. هەروەها گوتی، لە سلێمانی و کفریش تورکمان هەیە و چاویان لەوەیە کورسی ببەنەوە.

 

بەشداریی تورکمان لەم هەڵبژاردنە وەکو یەکەم ئەزموونی بەشداریی تورکمانە لە دەرەوەی کۆتاکان و ئایدن مەعرووف گوتی، وەکو یەک لیست بەشدار دەبن.

 

لەبارەی بڕیارەکەی دادگەش، ئایدن مەعرووف ئاماژەی بەوەکرد، "بڕیارەکەی دادگەی فیدراڵی سیاسی بوو، پێشتر نووسرابوو و دەمانزانی چییە."
وردەکاریی بڕیارەکانی دادگەی فیدراڵی

ئایدن مەعرووف دەڵێت، دادگە کارێكی خراپی کرد و دەستوەردان بوو لە کاروباری کۆتاکان. هەروەها گوتی، نێچیرڤان بارزانی و سەرۆکایەتیی هەرێمی کوردستان لە رابردوودا رۆڵێکی باشیان هەبووە لە پاڵپشتیکردنی پێکهاتەکان و داوای کرد، هەڵوێستیان لەبارەی بڕیارەکە هەبێت. 

وەکو ئایدن مەعرووف باسی کرد، تورکمان لە هەرێمی کوردستان هەموو کات "فاکتەرێک بوون بۆ ئاشتی."