کۆبوونەوەی شاندی دانوستاندنکاری پارتی و یەکێتی لە سلێمانی
رووداو دیجیتاڵ
پارتی دیموکراتی کوردستان و یەکێتی نیشتمانیی کوردستان لە سلێمانی کۆبوونەوە. هەردوولا لە راگەیێندراوێکی هاوبەشدا دەڵێن، کۆبوونەوەکانیان بەردەوام دەبێت "بۆ زیاتر لێکتێگەیشتن و داڕشتنی بەرنامەیەکی هاوبەشی پەسەندکراو لەپێناو بەرژەوەندی هاوڵاتیانی هەرێمی کوردستان.
کۆبوونەوەکە ئەمڕۆ شەممە، 22-02-2025، لە مەکتەبی سیاسیی یەکێتی لە سلێمانی کرا. بەگوێرەی راگەیێندراوە هاوبەشەکە "کۆبوونەوەکە تایبەت بوو بەخستنەڕوو و گفتوگۆکردنی راپۆرتی لیژنەی هاوبەشی هەردوولا کە بریتی بوو لە؛ تێڕوانینی سیاسی و کارگێڕی و هەنگاوەکانی پەیوەست بە پێکهێنانی کابینەی دەیەمی حکومەتی هەرێمی کوردستان و دامەزراوەکانی تر".
شاندی پارتی، هۆشیار زێباری و شاندی یەکێتی، قوباد تاڵەبانی سەرۆکایەتییان دەکرد. بەگوێرەی راگەیێندراوەکە، کۆبوونەوەی پارتی و یەکێتی "ئەرێنی" بووە و "تێبینیی وەفدی دانوستاندکاری هەردوولا خرایەڕوو و میکانیزمی گونجاو بۆ چۆنییەتی رێکخستنەوە و رێککەوتن لەسەر کۆی بابەتەکان قسەی لەسەر کرا".
بە وێنە؛ کۆبوونەوەی شاندی دانوستاندنکاری پارتی و یەکێتی بۆ پێکهێنانی حکومەت لە سلێمانی
— Rudaw (@Rudawkurdish) February 22, 2025
کۆبوونەوەکە "ئەرێنی" بووە و لە راگەیێندراوێکی هاوبەشدا دەڵێن: بڕیارمان دا کۆبوونەوەکانمان بەردەوام بێت pic.twitter.com/soxxwTCIxx
زیاتر لە سێ مانگ بەسەر هەڵبژاردن و زیاتر لە دوو مانگیش بەسەر یەکەم دانیشتنی خولی شەشەمی پەرلەمان تێپەڕیوە، بەڵام هێشتا لایەنە سیاسییەکان نەگەیشتوونەتە رێککەوتن بۆ هەڵبژاردنی سەرۆکایەتیی پەرلەمان و سەرۆکی هەرێمی کوردستان و پێکهێنانی کابینەی دەیەمی حکومەت.
لە کۆبوونەوەکەدا، "سەرنج و تێبینیی وەفدی دانوستاندکاری هەردوولا خرایەڕوو و میکانیزمی گونجاو بۆ چۆنییەتی رێکخستنەوە و رێککەوتن لەسەر کۆی بابەتەکان قسەی لەسەر کرا".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ