رووداو دیجیتاڵ
بەرپرسی گومرگەکانی پارێزگای ورمێی رۆژهەڵاتی کوردستان رایگەیاند لە دەروازەی سنووریی بازرگان دەست بەسەر 14 کیلۆگرام مادەی هۆشبەردا گیرا و کەسێکیش لەلایەن هێزە ئەمنییەکانەوە بە تۆمەتی بەقاچاخبردنی مادەکە دەستگیر کرا.
ئەمڕۆ دووشەممە، 22ی نیسانی 2024، خالید جەنگجۆ، بەرپرسی گومرگەکانی پارێزگای ورمێ رایگەیاند، لە کاتی کۆنترۆڵکردنی ئاسایی سنوورەکەدا فەرمانبەرانی دەروازەی سنووریی بازرگان گومان لە بارهەڵگرێک دەکەن، بۆیە بارهەڵگرەکە دەوەستێنین و دەیپشکنن.
خالید جەنگجۆ گوتی: "14 کیلۆ مادەی هۆشبەر لە جۆری شیشە لە نێو بارهەڵگرەکەدا دۆزرایەوە و دەستی بەسەردا گیرا."
هێزە ئەمنییەکان دەستیان بەسەر بارهەڵگرەکەشدا گرتووە، جەنگجۆ گوتی: "شۆفێری بارهەڵگرەکە بە تۆمەتی گواستنەوە و بەقاچاخبردنی مادەی هۆشبەر دەستگیر کراوە."
لە 19ی ئاداری 2024دا لە دەروازەی سنووریی بازرگان، دەستبەسەر 9 کیلۆگرام مادەی هۆشبەر لە جۆری شیشەدا گیرابوو و کەسێکیش بە تۆمەتی بەقاچاخبردنی مادەی هۆشبەر دەستگیرکرابوو.
رۆژی 12ی ئاداری 2024یش، لە هەمان دەروازەی سنووری، هێزە ئەمنییەکانی ئێران دەستیان بەسەر 150 کیلۆگرام مادەی هۆشبەر لە جۆری هێرۆیین و شیشەدا گرتبوو.
دەروازەی سنووریی بازرگان یەکێک لە دەروازە سنوورییەکانی نێوان ئێران و رۆژهەڵاتی کوردستانە لەگەڵ تورکیا و باکووری کوردستان، کە لە دیوی باکووری کوردستان وەکو دەروازەی سنووریی گوربولاک دەناسرێت.
بەهۆی هاوسنووربی پارێزگای ورمێ لەگەڵ باکووری کوردستان و تورکیا، ئەو پارێزگایە وەک شوێنێک بۆ ترانزێتی مادەی هۆشبەر بەرەو ئەورووپا دەناسرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ