رووداو دیجیتاڵ
بەڕێوەبەری بەرگریی شارستانیی زاخۆ رایگەیاند، تەرمی پیاوێک لە رووباری دیجلە دۆزراوەتەوە، کە هیچ ناسنامەیەکی پێ نەبووە. پۆلیسی زاخۆش دەڵێت، لێکۆلینەوە لە هۆکاری گیانلەدەستدانی دەکەن.
رۆژی هەینی، 22-09-2023، رائید جەمال هەسنی، بەڕێوەبەری بەرگریی شارستانیی زاخۆ بە تۆڕی میدیایی رووداوی گوت، کاژێر 11:00ـی پێشنیوەرۆی ئەمڕۆ لە دۆزینەوەی تەرمێک لە رووباری دیجلە ئاگادارکرانەوە و راستەوخۆ تیمەکانیان سەردانی شوێنی رووداوەکەیان کرد.
بە گوتەی بەڕێوەبەری بەرگریی شارستانی، ئەو تەرمەی دۆزراوەتەوە تەرمی پیاوێک بووە و هیچ ناسنامەیەکی پێ نەبووە. رائید جەمال هەسنی دەڵێت، دوای ئەوەی تیمەکانیان تەرمەکەیان دەرهێناوە راستەوخۆ کەیسەکە رادەستی پۆلیسی زاخۆ کراوە.
هەر ئەمڕۆ، بەڕێوەبەرایەتی پۆلیسی زاخۆ راگەیێندراوێکی بڵاوکردەوە و دەڵێت: "تەرمی هاووڵاتییەک لە رووباری دیجلە دۆزراوەتەوە و راستەوخۆ بنکەی پۆلیسی رزگاری لەگەڵ تیمەکانی بەرگری شارستانی زاخۆ تەرمی ئەو کەسەیان دەرهێناوە و رەوانەی دادپزیشکی زاخۆ کراوە بۆ ئەوەی هۆکاری گیانلەدەستدانی بزانرێت."
بەپێی راگەیێندراوەکەی پۆلیسی زاخۆ، لێکۆڵینەوە لە هۆکاری گیانلەدەستدانی و ئاشکراکردنی ناسنامەکەی دەستیپێکردووە، چونکە لە کاتی دۆزێنەوەیدا هیچ جۆرە ناسنامەیەکی پێ نەبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ