هەڵەیەک روویدا! دووبارە هەوڵبدە
رووداو دیجیتاڵ
وەزارەتەکانی ناوخۆى عێراق و هەرێمى کوردستان لیژنەیەکى هاوبەش پێکدەهێنن بۆ یەکخستنى رێنماییەکانى هاوردەکردنى ئۆتۆمبێل لە رووى گومرگ و مەرجەکانى سەلامەتى. گوتەبێژى بەڕێوەبەرایەتیى گشتیى هاتووچۆى عێراق دەڵێت، "راسپاردە بۆ سەرۆکوەزیران بەرزدەکرێتەوە و لەدواى پەسندکردنى، دەچێتە بوارى جێبەجێکردنەوە".
رۆژی 23ـى ئابى 2023، عەمید زیاد قەیسی، گوتەبێژى بەڕێوەبەرایەتیى گشتیى هاتووچۆى عێراق بە تۆڕى میدیایی رووداوى راگەیاند، "لیژنەیەکى هاوبەش لەنێوان هەردوو وەزارەتى ناوخۆى عێراق و هەرێمى کوردستان پێکهێندراوە بۆ یەکخستنى رێنماییەکانى هاوردەکردنى ئۆتۆمبێل لە سەرجەم دەروازە سنوورییەکان لە سەرانسەرى عێراق لە رووى مەرجەکانى سەلامەتى و شێواز و بڕى گومرگکردنى ئەو ئۆتۆمبێلە هاوردەکراوانە."
ئەندامانى لیژنەکە پێکهاتوون لە بەڕێوەبەرى گشتیى هاتووچۆى عێراق، نوێنەرى وەزارەتى ناوخۆى هەرێمى کوردستان و بەڕێوەبەرایەتییەکانى پۆلیسی هاتووچۆ و گومرگى هەرێمى کوردستان.
عەمید زیاد قەیسی گوتی، "لیژنەکە راسپاردەى خۆى لەوبارەیەوە بەرز دەکاتەوە بۆ سەرۆکوەزیرانى عێراق و لەدواى پەسندکردنى، کارى پێدەکرێت."
بەگوێرەى ئامارەکانى وەزارەتى پلاندانانى عێراق، نزیکەى هەشت ملیۆن ئۆتۆمبێل لە پارێزگاکانى عێراق هەن، ئەوە لەکاتێکدایە لە هەرێمى کوردستان نزیکەى دوو ملیۆن ئۆتۆمبێل بە هەموو جۆرەکانییەوە تۆمارکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ