هەڵەیەک روویدا! دووبارە هەوڵبدە
رووداو دیجیتاڵ
سەرۆکی دەستەی هەڵبژاردنەکانی هەرێمی کوردستان دەڵێت، "وێنەی هەموو ئەو فۆڕمانەی کە دەنگیان لەسەر دراوە و خراونەتە نێو سندووقەکان، دەخرێنە بەردەستی لایەنەکان."
ئەمڕۆ چوارشەممە 23-10-2024 نەبەرد عومەر، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق بە رووداوی گوت، "لە سێ رۆژی داهاتوودا، لە کۆنفرانسێکی رۆژنامەڤانیدا وێنەی هەموو ئەو فۆڕمانەی کە دەنگیان لەسەر دراوە و خراونەتە نێو سندووقەکان؛ دەخرێنە بەردەستی لایەنەکان و دەتوانن لێی بکۆڵنەوە."
رۆژانی 18 و 20ی ئەم مانگە، هەڵبژاردنی خولی شەشەمی پەرلەمانی کوردستان بەڕێوەچوو.
بە گوتەی نەبەرد عومەر، "دوای ئەوەی کاخەزەکان دەخرێنە بەردەستی حیزب و لایەن و بەربژێرەکان، ئەوانیش دەتوانن لێی بکۆڵنەوە و تانە لە ئەنجامی هەڵبژاردنەکان بدەن."
دوێنێ کۆمەڵی دادگەری، یەکگرتووی ئیسلامیی کوردستان، بەرەی گەل و رەوتی هەڵوێست لە کۆنفرانسێکی رۆژنامەڤانیی هاوبەشدا لە سلێمانی ئەنجامی هەڵبژاردنیان رەتکردەوە و رایانگەیاند، "بەڵگەی زۆر و بەهێزمان هەیە کە پێشێلکاری و ساختەکردن هەبووە و دەنگە راستەقینەکانمان وەرنەگرتووەتەوە."
نەبەرد عومەر، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق دەڵێت، "ئەگەر شتێکیان لەسەر کاخەزەکان دۆزییەوە، دەتوانن سکاڵا تۆمار بکەن و دەستەی دادوەرییش لە دەسەڵاتیدا هەیە، ئەنجامی هەڵبژاردنەکە پەسند نەکات."
ئەوانەی ئەنجامی هەڵبژاردن رەتدەکەنەوە، لیستی یەکگرتووی ئیسلامیی کوردستان 7 کورسی، رەوتی هەڵوێست 4 کورسی، کۆمەڵی دادگەری 3 کورسی و بەرەی گەل 2 کورسی.
نەبەرد عومەر ڕوونیکردەوە، "لەم هەڵبژاردنەدا، 1191 کەس خۆیان بەربژێر کردبوو، لەو ژمارەیە تەنیا 100 کەس دەردەچن. بێگومان بایی ئەوە گلەیی هەر دەکرێت. بەڵام من لەم 3 رۆژەدا هەموو وەڵامەکان بە داتا دەدەمەوە. هەموو لایەنەکان دەتوانن ئیشی لەسەر بکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ