رووداو دیجیتاڵ
هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەر درێژکردنەوەی ئاگربەستی لەگەڵ حکومەتی کاتیی دیمەشق بۆ رووداو پشتڕاستکردەوە و هۆکارەکەشی خستەڕوو.
ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەر، رۆژی شەممە، 24-01-2026، بە هێڤیدار ئەحمەد، نێردراوی رووداو لە رۆژئاوای کوردستانی راگەیاند، ئاگربەستەکە تاوەکو کاتێکی نادیار درێژکراوەتەوە.
ئیلهام ئەحمەد گوتی: "لەبەر دوو هۆکار ئاگربەستەکە درێژکرایەوە. یەکەمیان لەسەر داوای ئەمریکییەکان بوو بۆ گواستنەوەی چەکدارانی پێشووی داعش؛ هۆکارەکەی دیکەش بۆ گفتوگۆی زیاترە لەگەڵ دیمەشق بە ئامانجی گەیشتن بە چارەسەر".
سێشەممە 20-01-2026، ئاگربەست لەنێوان هێزەکانی سووریای دیموکرات و حکومەت دیمەشق بۆ چوار رۆژ راگەیێندرا و ئەمڕۆ کاژێر 08:00ی ئێوارەی ئاگربەستەکە کۆتایی دەهات.
پێش قسەکانی ئیلهام ئەحمەد، دوو سەرچاوەی باڵا لە هەسەدە و بەڕێوەبەرایەتیی خۆسەر بە تۆڕی میدیایی رووداویان گوت: "ئاگربەست درێژکراوەتەوە".
بەڵام بەرپرسێکی حکومەتی دیمەشق بە میدیای وڵاتەکەی راگەیاند، ئاگربەست درێژنەکراوەتەوە.
هەر ئەمڕۆ ئیلهام ئەحمەد رایگەیاند: "ئاگربەست و کۆتاییهێنان بە چالاکییە سەربازییەکان بەردی بناخەی جێبەجێکردنی رێککەوتنی 18ـی کانوونی دووەمە".
06ـی ئەم مانگە سوپای عەرەبیی سووریا بە هێرشکردنەسەر دوو گەڕەکی کوردنشین لە حەلەب، شەڕی دژی هێزەکانی سووریای دیموکرات (هەسەدە) دەستپێکرد و دواتر فراوانی کرد بۆ تەواوی ناوچەکانی باکوور و رۆژهەڵاتی سووریا کە لەژێر دەسەڵاتی هەسەدەدا بوون و بەشێکیانی کۆنترۆڵکرد.
دوای ئۆپەراسیۆنەکانی سوپای عەرەبیی سووریا، ئێستا هەسەدە بەشێکی ناوچەکانی رۆژئاوای کوردستانی لەژێر دەستدا ماوەتەوە، ئەویش قامشلۆ، حەسەکە و کۆبانی و دەوروبەریانە، کە ئەوەی کۆتاییان گەمارۆی تووندی خراوەتە سەر.
تاوەکو ئامادەکردنی ئەم هەواڵە، بەرپرسانی دیمەشق بە فەرمی درێژکردنەوەی وادەی ئاگربەستیان رانەگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ