هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری گشتیی سەرچاوە سرووشتییەکانی پارێزگای سنە دەڵێت، هەوڵەکان بۆ کۆنترۆڵکردن و کوژاندنەوەی ئاگری دارستانەکانی مەریوان بەردەوامن.
ئەمڕۆ یەکشەممە، 24ـی ئابی 2025، بەهزاد شەریفیپوور، بەڕێوەبەری گشتیی سەرچاوە سرووشتییەکانی پارێزگای سنە رایگەیاند: "پێنج رۆژە ئاگر لە دارستانی مەریوان کەوتووەتەوە. تاوەکو ئێستا بەشێکی ئاگرەکە کۆنترۆڵ کراوە."
بە گوتەی بەڕێوەبەری گشتیی سەرچاوە سرووشتییەکانی پارێزگای سنە، هەڵکردنی با کاری تیم و ژینگەپارێزانی بۆ کۆنترۆڵکردنی ئاگرەکە سەختتر کردووە.
بەهزاد شەریفیپوور گوتی: "بە هەوڵی تیمەکانی بەڕێوەبەرایەتیی سەرچاوە سرووشتییەکان، ژینگەپارێزان و خەڵکی ناوچەکە، ئاگری دارستانەکانی هەردوو گوندی بناوەچڵە و دەرەوەران کۆنترۆڵکرا، بەڵام لە دارستانەکانی نێوان گوندەکانی هانەشێخان و هەنجیران هێشتا ئاگرەکە بەردەوامە و بەهۆی ئەوەی ناوچەکە سەختە، کۆنترۆڵکردنی ئەستەمە."
بەهزاد شەریفپوور داوا دەکات، تەنیا ژینگەپارێزانی بەئەزموون و کەسانی شارەزای ناوچەکە بەشداری لە کوژاندنەوەی ئاگرەکەدا بکەن بۆ ئەوەی کارەساتی مرۆیی لێنەکەوێتەوە.
بەڕێوەبەری گشتیی سەرچاوە سرووشتییەکانی پارێزگای سنە رایگەیاند، 50 کەسی سەر بە تیمەکانی سەرچاوە سرووشتییەکان و 60 کەس لە ژینگەپارێزان لە کوژاندنەوەی ئاگری دارستانەکانی مەریوان بەشدارن.
باسی لەوەش کرد، بۆ کوژاندنەوەی ئاگری دارستانەکانی مەریوان داوای هێلیکۆپتەریان کردبوو کە رۆژی شەممە لە تارانەوە هاتووە و 32 جار هەوڵی کوژاندنەوەی ئاگرەکەی داوە.
سەبارەت بە زیانەکانیش، بەهزاد شەریفپوور دەڵێت، تاوەکو ئێستا هیچ هەڵسەنگاندنێکی فەرمی بۆ زیانەکان نەکراوە و دوای کۆنترۆڵکردنی ئاگرەکە خەمڵاندن بۆ زیانەکان دەکەن و بۆ رای گشتی رادەگەیێنێن.
17ـی ئابی 2025 ئاگر لە دارستانەکانی گوندی هانەشێخانی سەر بە شاری مەریوان کەوتەوە و رۆژی 20ـی مانگ لە لایەن تیمەکانی ئەنجوومەنی سەوزی چیای مەریوان، ژینگەپارێزانی خۆبەخش، خەڵکی ناوچەکە و تیمەکانی فەرمانگەی پاراستنی ژینگە شارەکەوە کۆنترۆڵ کرا، بەڵام ئێوارەی هەمان رۆژ ئاگر لە دارستانەکانی ناوچەکە سەریهەڵدایەوە.
دواتر ئاگرەکە بەرەو گوندەکانی گاگل، بناوچڵە، هەنجیران و دەرەوەران تەشەنەی سەند.
21ـی ئابی 2025، عیرفان حوسێنی، ژینگەپارێز و ئەندامی ئەنجوومەنی سەوزی چیای مەریوان بە تۆڕی میدیایی رووداوی راگەیاند: "لە دوێنێ ئێوارەوە ئاگر لە دارستانەکانی گوندی هانەشیخان سەریهەڵداوەتەوە و بەرەو گوندەکانی گاگل، بناوچڵە، هەنجیران و دەرەوەران تەشەنەی سەندووە."
لە دوو ملیۆن و 900 هەزار هێکتار رووبەری پارێزگای سنە، 340 هەزار هێکتاری دارستان و یەک ملیۆن و 740 هەزار هێکتار پووش و پاوان و لەوەڕگەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ