رووداو دیجیتاڵ
بەڕێوەبەری گشتیی کشتوکاڵی کرماشان دەڵێت، ساڵانە 130 هەزار تۆن پیاز لە پارێزگاکە بەرهەم دەهێنرێت؛ ئاماژە بەوەش دەکات، کرماشان لە بەرهەمهێنانی پیازدا لەسەر ئاستی ئێران حەوتەمە.
ئەمڕۆ هەینی 24-10-2025، سەعید کەریمی، بەڕێوەبەری گشتیی کشتوکاڵی کرماشان رایگەیاند، بەرهەمی ساڵانەی پیاز لە پارێزگاکە دەگاتە نزیکەی 130 هەزار تۆن کە دەبێتە 4.5٪ـی کۆی پیازی بەرهەمهاتوو لە ئێران.
بەگوتەی سەعید کەریمی، کرماشان بۆ بەرهەمهێنانی پیاز لەسەر ئاستی ئێران حەوتەمە و ''ئەوەش دەرخەری توانای پارێزگاکەیە لە بەرهەمهێنانی بەروبوومە کشتوکاڵییەکاندا.''
بەڕێوەبەری گشتیی کشتوکاڵی کرماشان جەختیشی لەوە کردەوە، بە لەبەرچاوگرتنی پلانی بەڕێوەبەرایەتییەکە بۆ پاڵپشتیی جووتیاران، پێشبینی دەکرێت ساڵانی داهاتوو بەرهەمهێنانی پیاز لە پارێزگاکە زیاتر بێت.
لە پارێزگای کرماشان 950 هەزار هێکتار زەویی کشتوکاڵی و باخ هەیە و ساڵانە بەرهەمی کەرتەکە زیاتر لە چوار ملیۆن و 700 هەزار تۆنە. هەروەها زیاتر لە 120 هەزار کەس لە کەرتی کشتوکاڵی پارێزگاکەدا کار دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ