رووداو دیجیتاڵ
ئەمڕۆ هاونیشتمانییەک کە لە گەشتی عومرە بووە لە سعودیە، کۆچی دوایی کرد. برایەکی کۆچکردووەکە دەڵێت، نوێژی بەیانیی کردووە و لە رێگە بووە بۆ کەعبە، جەڵتە لێیداوە، کەوتووە و دەستبەجێ گیانی لەدەستداوە.
بەڕێوەبەرایەتیی حەج و عومرەی هەرێمی کوردستان رایگەیاند، ئەمڕۆ یەکشەممە 24-12-2023 هاونیشتمانییەک بەناوی خالید ئەحمەد مەحموود، تەمەن 43 ساڵ، کە بۆ گەشتی عومرە لە وڵاتی سعودیە بوو، گیانی لەدەستدا.
خالید ئەحمەد خەڵکی قەزای پێنجوێن و دانیشتووی سلێمانی بووە. محەممەد ئەحمەد، برای خالید بە تۆڕی میدیایی رووداوی گوت، "خالیدی برام هیچ نەخۆش نەبوو؛ ئەمڕۆ نوێژی بەیانیی کردووە و ویستوویانە بچنە کەعبەی پیرۆز، کەوتووە و دەستبەجێ گیانی لەدەستداوە."
محەممەد ئەحمەد ئاماژەی بەوەش کرد، براکەی بەهۆی جەڵتەی دڵەوە کۆچی دواییکردووە؛ دوای رێکارە ئایینی و کارگێڕییەکان لە وڵاتی سعودییە بەخاک دەسپێردرێت.
بەگوێرەی حەج و عومرەی هەرێمی کوردستان، لە سەرەتای دەستپێکردنی وەرزی عومرەی ئەم ساڵەوە 13 عومرەکاری کورد لە سعودیە کۆچی دواییان کردووە؛ شەشیان پیاو و حەوتیان ئافرەتن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ