رووداو دیجیتاڵ
بەڕێوەبەری ژینگەی مهاباد دەڵێت، دوای بارانبارینەکانی ئەمدواییە بەشێکی تاڵاوی کانی بەرازان بووژاوەتەوە.
رۆژی پێنجشەممە، 25ی کانوونی یەکەمی 2025، فارووق سلێمانی، بەڕێوەبەری ژینگەی مهاباد بە میدیای فەرمیی ئێران رایگەیاند، لە ماوەی رابردوودا بەهۆی ئەو چەند شەپۆلە بەفر و بارانبارینەی ناوچەکەیان گرتەوە، ئاوێکی بەرچاو لە تاڵاوی کانی بەرازان کۆبووەتەوە و بەشێکی تاڵاوەکە بووژاوەتەوە.
فارووق سلێمانی گوتی، بەپێی دوایین زانیارییەکان 300 هێکتار لە رووبەری تاڵاوەکە بووژاوەتەوە و ئێستاش زیاتر لە یەک ملیۆن مەتر سێجا ئاو لە تاڵاوەکە کۆبووەتەوە.
لە مانگی ئەیلووی ئەم ساڵدا وشکبوونی تاڵاوی کانی بەرازان خێراتر بوو، تاوەکو مانگی تشرینی یەکەم بەشێکی زۆری تاڵاوەکە وشک بوو، بەڵام بارانبارینی ئەم دواییە تاڵاوەکەی بووژاندەوە.
بە گوتەی بەڕێوەبەری ژینگەی مهاباد، دوای بووژانەوەی تاڵاوی کانی بەرازان، باڵندەکانیش روویان لە تاڵاواوەکە کردووەتەوە.
تاڵاوی کانی بەرازان لە 30 کیلۆمەتری باکووری مهاباد و لە ناوچەی شاروێران هەڵکەوتووە. رووبەری تاڵاوەکە 910 هێکتارە و دەیان جۆر باڵندە و بوونەوەری ئاوی تێدا دەژین.
جگە لە تالاوی کانی بەرازان، لە مهاباد پێنج تاڵاوی دیکە هەن، ئەوانیش تاڵاوی گەرووس، قووپی باباعەلی، حەسەن خان، داشخانە و قەرەقشلاق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ