هەڵەیەک روویدا! دووبارە هەوڵبدە
رووداو دیجیتاڵ
بەپێی زانیارییەکانی رووداو، لەنێو شاندەکەی بەغدا، نوێنەری وەزارەتەکانی نەوت و دارایی عێراق هەن. بڕیاردەری فراکسیۆنی پارتیش لە پەرلەمانی عێراق دەڵێت، ئەمشەو یان سبەی شاندێکی حکومەتی عێراق لەسەر پرسی مووچە سەردانی هەولێر دەکات.
رۆژی پێنجشەممە، 26ـی حوزەیرانی 2025، شوان کەلاری، بڕیاردەری فراکسیۆنی پارتی لە پەرلەمانی عێراق بە تۆڕی میدیایی رووداوی راگەیاند، "بە ئەگەرێکی زۆر ئەمشەو شاندێکی باڵای حکومەتی فیدراڵ سەردانی هەرێمی کوردستان دەکات و لەبارەی پرسی مووچە و هەناردەکردنەوەی نەوت لەگەڵ بەرپرسانی حکومەتی هەرێمی کوردستان کۆدەبنەوە".
2025-06-25، دوای تەواوبوونی کۆبوونەوەی ئەنجوومەنی وەزیران، مەسرور بارزانی لە کۆنفرانسێکی رۆژنامەڤانیدا رایگەیاند: "بۆ چارەسەرکردنی ئەم قەیرانانە، لەگەڵ بەغداش بەردەوام لە پەیوەندیدا بووین، دوێنێ شەو خۆم لەگەڵ بەڕێز سەرۆکی ئەنجوومەنی دادوەریش قسەم کردووە و لەگەڵ بەڕێز سەرۆک وەزیرانیش قسەم کردووە کە ئێمە بەرەو چارەسەری ئەم قەیرانە بڕۆین. ئەوانیش بە خۆشحاڵییەوە رایانگەیاند کە ئامادەن لە ماوەیەکی زۆر زۆر نزیک لەم یەک دوو رۆژەدا، شاندێک بنێرن بۆ ئەوەی لەگەڵ ئێمە بکەونە گفتوگۆی راستەقینە لەسەر ئەم بابەتە و چارەسەرکردنی گرفتی مووچەی مووچەخۆرانی هەرێمی کوردستان".
28ـی ئایاری 2025 وەزارەتی دارایی عێراق بە نووسراوی فەرمی حکومەتی هەرێمی کوردستانی لەوە ئاگادارکردەوە چی دیکە ناتوانێت پارە بۆ مووچەی مانگەکانی دیکەی ئەم ساڵ بنێرێت، بە پاساوی ئەوەی پابەند نەبووە بە رادەستکردنی داهاتی نەوتی و نانەوتی، و نەبوونی تەرخانی پارە بۆ هەرێمی کوردستان.
دواین جار، 2025-05-13، وەزارەتی دارایی و ئابووریی هەرێمی کوردستان رایگەیاند، بڕی 959 ملیار و 514 ملیۆن دینار وەکو شایستەی مووچەی مانگی نیسانی فەرمانبەران و مووچەخۆرانی هەرێمی کوردستان خرایە سەر هەژماری بانکیی وەزارەتی دارایی و ئابووریی هەرێمی کوردستان لە لقی هەولێری بانکی ناوەندیی عێراق. هەر ئەو رۆژە لیستی مووچە بڵاوکرایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ