هەڵەیەک روویدا! دووبارە هەوڵبدە
ئەسڵان و لەیلا و باوکیان
رووداو - هەولێر
یەکەم ماڵباتی کورد لە ئۆکرایناوە گەڕانەوە هەرێمی کوردستان. رەفعەت ئیسماعیل، خەڵکی هەولێرە و نزیکەی 15 ساڵە لە شاری میکۆلایڤی ئۆکراینایە، وڵاتینامەی ئەوێی هەیە. لە دەستپێکی شەڕ دەچنە ئەنقەرەی پایتەختی تورکیا و ئیدی ناگەڕێتەوە ئۆکراینا.
رەفعەت ئیسماعیل دەڵێت، "مەوعیدی پزیشکمان هەبوو، هاوژینەکەم لەگەڵ ئەسڵان نەخۆش بوون، چووین بۆلای پزیشک لە نەخۆشخانە و بۆ رۆژی دواتر شەڕ دەستیپێکرد. لە نیکۆلایڤ دەژیم، کاری کشتوکاڵی دەکەم و بەرهەمەکەی دەنێرمە کوردستان لە پیاز، پەتاتە و سێو. ماڵ و حاڵم هەمووی جێهێشتووە و شەڕێکی زۆر قورسە ئێستا لە خیرسۆن و نیکۆڵایڤ".
ئەسڵان و لەیلا منداڵەکانی رەفعەتن؛ لەیلا تەمەنی 13 ساڵ و ئەسلان تەمەنی 11 ساڵە، لە تەمەنی خۆیاندا سێ جار هاتوونەتە باشووری کوردستان. لەبەر خزم و کەسوکاریان پێداگرییان کردووە کە بێنە هەولێر.
لەیلا رەفعەت دەڵێت، "لێرە خزم و کەسمان هەیە، ئۆکراینا زۆر خۆش نییە، لەوێش کەسوکارمان هەیە، بەڵام پێمان خۆشە لە هەولێر بین لە کوردستان".
ئەسڵان رەفعەت-یش دەڵێت، بۆیە هاتوونەتە هەولێر و نەچوونەتە شوێنێکی دیکە، چونکە "لێرە خزم و کەسوکارمان هەیە، ئێرە خۆشە و دەتوانین لەگەڵ خزم و کەسوکارمان پیاسە بکەین".
ئانژڵا هاوژینی رەفعەتە و کوردی روسیایە، لە تەمەنێکی کەمدا لەگەڵ کەسوکاری چوونەتە ئۆکراینا. بە قسەکانیدا وادیارە دۆخی ئۆکراینا رۆژبەرۆژ ئاڵۆز و دژوار دەبێت.
ئانژڵا مەولوود، هاووڵاتیی ئۆکراینی زمانی کوردی فێربووە و دەڵێت، "هەموو رۆژێک لە ژێرزەمین خەڵک خۆیان دەشارنەوە لەبەر بۆمب و تانک و سەربازی رووسیا، خەڵک هەنێک خواردنیان کڕیبوو پێش روودانی شەڕ، بەڵام تاوەکو کەی ئەوە دەبێت، نازانین".
ئەسڵان و لەیلا و دایک و باوکیان بۆ ماوەیەکی نادیار میوانی هەولێرن. چوار رۆژ بەسەر شەڕی ئۆکراینا و رووسیا تێدەپەڕێت. بە رێگەی جیاجیا زیاتر لە 350 هەزار کەس بەرەو دەرەوەی ئۆکراینا رۆشتوون. ئاسمانی ئۆکراینا رۆژێک دوای دەستپێکی شەڕ بەڕووی جیهاندا داخرا. حکومەتی ئۆکراینا تەنیا رێگە بە دەرچوونی ژن و منداڵ و پیاوانی سەرووی 60 ساڵ دەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ