کەمال کەرکووکی: لەگەڵ خیانەتکارانی 16ی ئۆکتۆبەر بە یەک لیست بەشداریی هەڵبژاردنەکانی کەرکووک ناکەین

 

 

رۆژی سێشەممە 27ی حوزەیرانی 2023 کەمال کەرکووکی، بەرپرسی مەکتەبی رێخکستنی پارتی دیموکراتی کوردستان لە کەرکووک - گەرمیان دوای کۆبوونەوە لەگەڵ 10 لایەنی کوردستانی لە کۆنفرانسێکی رۆژنامەڤانیدا رایگەیاند، "تاوتوێی بارودۆخی کەرکووک و ناوچەکەمان کرد و بە وردی لەسەر پرسی هەڵبژاردن گفتوگۆمان کرد، هەموومان هاودەنگ بووین کەرکووک داگیرکراوە و لەبن دەستی پارێزگارێکی شۆڤێنی بەزۆر سەپێندراوە، بۆیە دەبێت لەم هەڵبژاردنەدا بە هیمەتێکی بەرزەوە بەشداربین."

 

کەمال کەرکووکی ئاماژەی بەوەش دا، کۆبوونەوەکانیان لەگەڵ لایەنە کوردستانییەکان بەردەوام دەبێت و گوتی، "ئەمڕۆ کەرکووک لە دۆخێکی نالەباردایە و هیچ خزمەتگوزارییەکی نییە و پێکهاتە رەسەنەکانی هەموویان لەژێر ستەمدان، بۆیە پشتیوان بە خودا و گەلی کوردستان و ئەم لایەنە سیاسییانە، دۆخەکە چاک دەکەینەوە و بە سەربەرزی دەگەڕێینەوە و ئاڵای کوردستانی لێ دەشەکێنینەوە."

 

کۆبوونەوەکە لە بارەگای ئەنجوومەنى سەرکردایەتيی کەرکووک - گەرمیانی پارتی دیموکراتی کوردستان لە هەولێر بەڕێوەچوو. بە گوتەی کەمال کەرکووکی، پارتی ئامادەیە لەگەڵ هەموو لایەنە کوردستانییەکان بە یەک لیست لە هەڵبژاردنی کەرکووک بەشداری بکات جگە لە لایەنێک و دووپاتیکردەوە؛ "هۆی داگیرکردنی کەرکووک خیانەتکارانی 16ی ئۆکتۆبەرن، ئێمە وەکو رێکخستنی مەکتەبی کەرکووک – گەرمیانی پارتی دیموکراتی کوردستان لەگەڵ ئەوەین کە لەگەڵ هەموو کەس و لایەنێک بەشداربین جگە لە خیانەتکارانی 16ی ئۆکتۆبەر."

 

مەکتەبی رێکخستنی پارتی دیموکراتی کوردستان لە کەرکووک - گەرمیان جگە لە یەکێتی، سەرجەم لایەنە کوردستانییەکانی بانگهێشتی کۆبوونەوەکە کردبوو، بەڵام بزووتنەوەی گۆڕان و کۆمەڵی دادگەری ئامادەی کۆبوونەوەکە نەبوون. کەمال کەرکووکی دەڵێت، "سەرجەم لایەنەکانمان بانگهێشتکردبوو، جگە لە خیانەتکارانی 16ی ئۆکتۆبەر، ئەو بەڕێزانەی بەشدار نەبوون، گوتیان ئەمڕۆ عەرەفەیە و بەڕۆژووین، بەڵام بۆ دوای جەژنی قوربان لەگەڵیان کۆدەبینەوە."