رووداو دیجیتاڵ
داوای قەدەخەکردنی ئەو گردبوونەوەیە دەکرێ کە بڕیارە دەم پارتی لە ئامەد بۆ عەبدوڵڵا ئۆجەلان رێکی بخات.
بڕیارە رۆژی 4ی کانوونی دووەمی 2026، لە ئامەد بە دروشمی "ئازادی" بۆ عەبدوڵڵا ئۆجەلان، دەم پارتی گردبوونەوەیەک رێکبخات. گرووپێک پارێزەر کە دژی گردبوونەوەکەن، داواکارییان پێشکێشی پارێزگای ئامەد، وەزارەتی ناوخۆ و سەرۆکایەتیی کۆماری تورکیا کردووە بۆ ئەوەی رێگری لە چالاکییەکە بکرێ.
پارێزەرەکان هۆکاری داوای قەدەخەکردنی گردبوونەوەکە بۆ ئەوە دەگەڕێننەوە کە هەر گردبوونەوەیەکی لەو شێوەیە بە "پڕوپاگەندە بۆ رێکخراوی تیرۆریستی" و "ستایشکردنی تاوان و تاوانکار" هەژمار دەکرێ.
لە داواکارییەکەدا ئاماژە بەوە کراوە کە گردبوونەوەکە لە رووی پاراستنی ئاسایش و سەقامگیریی گشتییەوە "مەترسیی ئاشکرا و نزیک" دروست دەکات، بۆیە داوای دەرکردنی بڕیاری قەدەخەکردن کراوە بە پشتبەستن بە مادەی 34ی دەستوور، یاسای ژمارە 2911ی تایبەت بە گردبوونەوە و خۆپێشاندانەکان و یاسای ژمارە 5442ی تایبەت بە ئیدارەی پارێزگاکان.
پارێزەرەکان لە راگەیێندراوەکەیاندا باس لەوە دەکەن، رێگەدان بە گردبوونەوەکە دەسەڵاتی دەوڵەت لاوازدەکات و ئەگەر کردەوەی هاوشێوە بۆ ناوچەکانی دیکەش بگوازرێتەوە، گرژیی کۆمەڵایەتی زیاد دەکات.
گرووپەکە بانگەوازی ئاراستەی پارتە سیاسییەکانیش کردووە و رایگەیاندووە، پێویستە پارتەکان هەڵوێستێکی روونیان بەرامبەر بەم گردبوونەوەیە هەبێت.
پارێزەرەکان رایانگەیاندووە، داواکارییان پێشکێشی کۆمیسیۆنی ئاسایشی پەرلەمانی تورکیاش کردووە و هاوکات لە داواکاری گشتیی کۆماری لە ئامەد سکاڵای یاساییان تۆمار کردووە.
19ـی کانوونی یەکەمی 2025، دەوڵەت باخچەلی، سەرۆکی مەهەپە رایگەیاند: "بە بڕوای من، رێکخستنی ئەم گردبوونەوە جەماوەرییەی دەم پارتی لە 4ی کانوونی دووەمی 2026، هیچ لایەنێکی نەرێنی و رێگریکردنێکی نییە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ