رووداو دیجیتاڵ
گوتەبێژی دەستەی ژینگەی هەرێمی کوردستان دەڵێت، رێژەی سەوزایی هیچ شارێکی هەرێمی کوردستان لە ئاست چاوەڕوانیدا نییە، پلانیان ئەوەیە بیگەیێننە 25%. ئاماژە بەوەش دەکات، بەراورد بە رابردوو هەوای هەولێر باشتر بووە.
د. سەنعان عەبدوڵڵا، گوتەبێژی دەستەی ژینگەی هەرێمی کوردستان، ئەمڕۆ یەکشەممە بە تۆڕی میدیایی رووداوی گوت: "بەگوێرەی داتای شارەوانییەکان، تێكڕا رێژەی سەوزایی لە هەرێمی کوردستان 19%یە، بەڵام داتای وەزارەتی کشتوکاڵ دەڵێت 13%یە".
بە گوتەی گوتەبێژی دەستەی ژینگە، سنووری دهۆک بەراورد بە پارێزگاکانی دیکە رێژەی سەوزایی زیاترە. گوتیشی: "ئامانجی ئێمە زیاترە لەو رێژانەیە و گەیاندنیێتی بە 25% لە هەموو شارەکان".
لەبارەی هەوای شارەکان، د. سەنعان عەبدوڵڵا دەڵێت: "ئاستی پیسیی هەوای هیچ شارێکی هەرێمی کوردستان نەگەیشتووەتە ئاستی مەترسیدار، هەولێر ئاستی هەوای لە هەمووی پیستر بوو، بەڵام ئێستا کەمێک گۆڕانکاری روویداوە".
گوتەبێژی دەستەی ژینگە لەبارەی هەولێرەوە گوتی: "پڕۆژەی رووناکی و کوژاندنەوەی زیاتر لە هەزار موەلیدە، هەروەها هێنانی ئۆتۆمبێلی کارەبایی و دانانی مەرج لەسەر کارگە و پاڵاوگەکان کاریگەرییان لەسەر کەمێک باشتربوونی هەوای هەولێر کردووە".
د. سەنعان گوتی: "ئەو هەوا پیسەی بە روونی لە هەولێر دەبینرا بە رێژەیەک کەمیکردووە، بەڵام هێشتا گازە پیسە کیمیاییەکان لە ئاسمانی شارەکەدا ماون".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ