هەڵەیەک روویدا! دووبارە هەوڵبدە
رووداو دیجیتاڵ
بەرپرسێکی وەزارەتی دارایی دەڵێت، داهاتی نانەوتی ئامادەیە، بەڵام تاوەکو ئێستا هیچ فەرمانێکیان بۆ ئامادەکاری و ناردنی بۆ بەغدا پێنەگەیشتووە.
رۆژی سێشەممە، 29ـی تەممووزی 2025، بەرپرسێکی وەزارەتی دارایی بە تۆڕی میدیایی رووداوی راگەیاند، "بەپێی رێککەوتنی نێوان هەولێر و بەغدا، دەبێت مانگانە هەرێمی کوردستان 120 ملیار دینار وەکو داهاتی نانەوتی رادەستی بەغدا بکات، هەفتەی رابردوو بۆ مووچەی مانگی ئایار 120 ملیار دینار بۆ بەغدا نێردرا."
بەگوتەی ئەو سەرچاوەیە، پارەی داهاتی نانەوتی مانگی حوزیران لە بانکەکان هەیە و چاوەڕێی فەرمانن بۆ رادەستکردنی، بەڵام هیچ ئاگادارکردنەوەیەکیان پێنەگەیشتووە.
ئەو بەرپرسە دەڵێت، "دوای ئەوەی فەرمانمان پێگەیشت، چەند رێکارێک هەیە دەیکەین و پارەکە دەخرێتە سەر هەژماری بانکیی عێراق."
زیاتر لە مانگێکە لیستی مووچەی مانگی حوزەیرانی مووچەخۆرانی هەرێمی کوردستان بۆ بەغدا نێردراوە. ئەو بەرپرسە دەڵێت، "لە بەغدا وردبینی لە لیستی مووچەی مانگی حوزەیران تەواو بووە، تاوەکو ئێستا هیچ تێبینییەکیان لەسەر لیستەکە پێ نەگوتووین."
بڕیارە رۆژی چوارشەممە، ئەنجوومەنی وەزیرانی هەرێمی کوردستان کۆبوونەوەی ئاسایی خۆی بکات و سێ پرس تاوتوێ بکات، کە بریتین لە بەدواداچوون بۆ خەرجکردنی مووچەی مانگەکانی حوزەیران و تەممووز، دەستپێکردنەوەی هەناردەکردنی نەوت و پێشنیازەکانی وەزارەتی پێشمەرگە.
بەپێی کارنامەی کۆبوونەوەکە کە وێنەیەکی دەست تۆڕی میدیایی رووداو کەوتووە، لە بڕگەی یەکەمدا، ئەنجوومەنی وەزیران تاوتوێی هەنگاوەکانی خەرجکردنی مووچەی مانگەکانی حوزەیران و تەممووزی 2025 دەکات، ئەمەش لەسەر بنەمای ئەو بڕیارە هاوبەشانەی لەگەڵ حکومەتی فیدراڵی دەریکردوون. هەر لەو بڕگەیەدا، بەدواداچوون بۆ کارەکانی لیژنە و تیمی هاوبەشی دیوانی چاودێریی دارایی هەولێر و بەغدا دەکرێت.
لە بڕگەی دووەمی کۆبوونەوەکەدا، گفتوگۆ لەبارەی دەستپێکردنەوەی هەناردەی نەوتی هەرێمی کوردستان دەکرێت لەبەر رۆشنایی ئەو دوو بڕیارە هاوبەشەی کە پێشتر لەنێوان حکومەتی هەرێمی کوردستان و حکومەتی فیدراڵیدا دەرکراون.
وەزارەتی دارایی عێراق 24ـی تەممووز مووچەی مانگی ئایاری هەرێمی کوردستانی نارد، بەڵام تاوەکو ئێستا وادەی ناردنی مووچەی مانگی حوزەیران دیار نییە، لەکاتێکدا بەرەو کۆتایی مانگی تەممووز دەچین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ