هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری تەندروستیی ئاژەڵ لە وەزارەتی کشتوکاڵی هەرێمی کوردستان رایگەیاند، لە سەرەتای ئەم ساڵەوە 9 تووشبووی تای خوێنبەربوون تۆمارکراون و زۆرترین لە دهۆک بووە بە 5 تووشبوو.
رۆژی شەممە، 30ـی ئابی 2025، د. فەرەیدوون حەمەد، بەڕێوەبەری تەندروستیی ئاژەڵ لە وەزارەتی کشتوکاڵی هەرێمی کوردستان بە تۆڕی میدیایی رووداوی راگەیاند: "بەراورد بە پار، تووشبوون بە تای خوێنبەربوون کەمی کردووە و لەگەڵ کۆتاییهاتنی وەرزی گەرما، مەترسییەکەشی کەمتر دەبێتەوە."
پار لە هەرێمی کوردستان 16 کەس تووشی تای خوێنبەربوون بوون. بە گوتەی د. فەرەیدوون حەمەد: "ئەم ساڵ تاوەکو ئێستا 9 کەس تووشی تای خوێنبەربوون بوون؛ دووانیان لە هەولێر، دووانیان لە سلێمانی و پێنجیان لە دهۆک."
ئەمڕۆ شەممە، وەزارەتی تەندروستیی هەرێمی کوردستان بڵاویکردەوە، تووشبوویەکی دیکەی تای خوێنبەربوون تۆمارکراوە کە تەمەنی 43 ساڵە، دانیشتووی قەزای سێمێلە و قەسابە.
وەزارەتەکە روونیکردەوە، تووشبووەکە نیشانەکانی نەخۆشییەکەی هەیە، ئێستا لەژێر چاودێریی وردی پزیشکیدایە و لە نەخۆشخانە خەوێندراوە.
لەوبارەیەوە، مەتین جەمیل، گوتەبێژی راگەیاندنی تەندروستیی پارێزگای دهۆک بە رووداوی گوت: "هەفتەی رابردوو پشکنینەکانی ئەو تووشبووە بۆ بەغدا نێردران، رۆژی پێنجشەممە ئەنجامەکەی گەڕایەوە کە هەڵگری ڤایرۆسەکەیە، بەڵام تەندروستیی جێگیرە و هەموو رێکارە پێویستەکانیشی بۆ کراوە."
بەپێی ئامارەکانی تەندروستیی دهۆک:
- لە ساڵی 2023ـدا شەش کەس تووشی ڤایرۆسەکە بوون و هیچ کەسێک گیانی لەدەستنەدا.
- لە ساڵی 2024ـدا پێنج کەس تۆمارکرابوون و یەک کەس گیانی لەدەستدا.
- ئەم ساڵ پێنج کەس تۆمارکراون، بەڵام دووانیان گیانیان لەدەستداوە.
ساڵی 2023، لە هەرێمی کوردستان 9 کەس بەهۆی تای خوێنبەربوونەوە گیانیان لەدەستدا.
تای خوێنبەربوون نەخۆشییەکی ڤایرۆسیی هاوبەشە لەنێوان مرۆڤ و ئاژەڵدا، لە رێگەی گەنەوە بۆ ئاژەڵ دەگوازرێتەوە و مرۆڤیش لە ئاژەڵەوە تووش دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ