شاخەوان عەبدوڵڵا: بەڵێن درا شایستەی هەموو جووتیاران خەرج بکرێت

 

شاخەوان عەبدوڵڵا، جێگری سەرۆکی پەرلەمانی عێراق لەگەڵ ئەسیر داود، وەزیری بازرگانیی عێراق کۆبووەوە و رایگەیاند، شایستەی جووتیارانی باشووری کوردستان خەرج دەکرێت و لە چەند رۆژی داهاتوودا 500 ملیار دینار دەخرێتە سەر هەژماری وەزارەتی بازرگانیی عێراق.

 

جێگری سەرۆکی پەرلەمانی عێراق باسی لەوە کرد، ئەو جووتیارانەی تاوەکو 50 تۆن گەنمیان رادەستکردووە، سەرەتا شایستەی ئەوان دەدرێت و دواتر شایستەی ئەو جووتیارانە خەرج دەکرێت کە زیاتر لە 50 تۆنیان رادەستکردووە.

 

 

لە دیدارێکدا لەگەڵ بەڕێز ئەسیر داود، وەزیری بازرگانی تاوتوێی شایستەی جووتیارانمان کرد و بەڵێن درا شایستەی سەرجەم جووتیاران بدرێت لە هەرێمی کوردستان، کەرکووک، مەخموور و تەواوی ئەو ناوچانەی دواکەوتوون، بۆ گەڕی ئەمجارە کە 500 ملیار دینار تەرخان کرا و لە چەند رۆژی داهاتوودا دەخرێتە سەر هەژماری وەزارەتی بازرگانی، سەرەتا شایستەی ئەو جووتیارانە دەدرێت کە بڕکەی کەمە و ناتوانرێت زیاتر دوابخرێت، بڕیار درا ئەوانەی تاوەکو 50 تۆنیان رادەستکردووە، لە گەڕی ئەم جارە هەمووی خەرج بکرێت، دواتر بۆ ئەوانەی لە 50 تۆن زیاتریان رادەست کردووە.