کامیل حاجی عەلی دوای بایکۆتی هۆڵی کۆنگرە قسەی بۆ لایەنگرانی کرد
رووداو دیجیتاڵ
کامیلی حاجی عەلی و لایەنگرەکانی، لەگەڵ عیرفانی مەلا عەلی و لایەنگرەکانی، لەسەر داوای کۆمسیۆنی باڵای سەربەخۆی هەڵبژاردنەکانی عێراق لە سلێمانی کۆنگرەی "دامەزراندن"یان بەست، ئەوەش بۆ یەکلاییکردنەوەی پۆستی رابەری حیزب و هەڵبژاردنەوەی ئەنجوومەنی شوورا.
لایەنگرانی باڵەکەی کامیلی حاجی عەلی دەڵێن، فێڵیان لێکراوە و ژمارەیەک کەس بە نایاسایی بۆ لیستی ئەندامانی کۆنگرە لە بەرژەوەندیی باڵەکەی عیرفانی مەلا عەلی زیادکراون، بۆیە بایکۆتی هۆڵەکەیان کرد و چوونە دەرەوە، بەهۆیەوە کۆنگرە بۆ کاتێکی دیکە دواخرا.
د. محەممەد بازیانی، گوتەبێژی باڵی کامیلی حاجی عەلی بە رووداوی گوت، "ناوی خەڵکی ئێمە زۆریان دەرکردووە و کۆمەڵێک ناوی دیکە زیادکراوە و خراوەتە شوێنیان، ئەوە بە قسەی ئەندامانی بەڕێوەبەرایەتیی پارت و لایەنە سیاسییەکان لە کۆمیسیۆنی سەربەخۆی هەڵبژاردنەکان".
لایەنی عیرفان مەلا عەلی عەبدولعەزیز کە میراتگری رابەرایەتیی بزووتنەوەن، دەڵێن، ئەو ناوانەی زیادکراوە کۆمیسیۆن کردوویەتی و نەهاتنە نێو کێبڕکێی کۆنگرە، ترسە لە دەرنەچوون.
سەعد عەبدوڵڵا، گوتەبێژی کۆنگرەی بزووتنەوە لە باڵی عیرفان مەلا عەلی بە رووداوی گوت: "زیادکردنی ئەو ناوانە بە نایاسایی ئەنجام نەدراوە، هەموو ئەو ناوانە 60 بۆ 70 کەسن کە خۆیان لە بزووتنەوە پۆستی باڵایان هەبووە و بە یاسایی کراوە".
لە کۆمیسیۆن ناوی دوو هەزار و 352 کەس تۆمارکراوە وەکو ئەندامی کۆنگرە و دەبێت لەنێو هۆڵەکە هەزار 176 کەس ئامادەبن بۆ دەنگدان، بەڵام هیچ کام لە دوو باڵەکەی بزووتنەوە نەیانتوانی ئەو رێژەیە بە تەنیا لە لایەنگرانی خۆیان ئامادە بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ