رووداو دیجیتاڵ
بڕیاربوو ئەمڕۆ جڤاتی نیشتمانی بزووتنەوەی گۆڕان کۆببێتەوە و خانەی راپەڕاندن و رێکخەری گشتیی بزووتنەوەکە هەڵبژێرێت، بەڵام کۆبوونەوەکە دواخرا؛ بەرپرسێکی بزووتنەوەکە دەڵێت، گفتوگۆی یاساییان لەگەڵ کۆمیسیۆن هەیە، بۆیە هەڵبژاردنەکەیان دواخستووە. بەگوێرەی زانیارییەکانی رووداو، پێدەچێت پێش هەڵبژاردنی رێکخەر و خانەی راپەڕاندن، گۆڕان کۆنفرانس ببەستێت.
12-12-2023 بزووتنەوەی گۆڕان دەرگای خۆبەربژێرکردنی بۆ ئەندامانی خانەی راپەڕاندن و رێکخەری گشتیی بزووتنەوەکە کردەوە، کە بڕیاربوو شەش رۆژ بەردەوام بێت، بەڵام دوای دوو جار درێژکردنەوە بڕیاربوو ئەمڕۆ 30-12-2023، جڤاتی نیشتمانی بزووتنەوەکە کۆببێتەوە و خانەی راپەڕاندن و رێکخەری گشتی هەڵبژێردرێت، بەڵام ئەمڕۆش هەڵبژاردنەکە نەکرا.
بەرپرسێکی باڵای بزووتنەوەی گۆڕان بە تۆڕی میدیایی رووداوی گوت، "جڤاتی نیشتمانی کۆنەبووەوە بۆ هەڵبژاردنی ئەندامانی خانەی راپەڕاندن و رێکخەری گشتی، چونکە لەگەڵ کۆمیسیۆنی هەڵبژاردن کەمێک کێشەی یاساییمان هەیە".
بۆ پەسەندکردنی کۆنگرەی حیزبەکان، دەبێت فەرمانگەی پارتە سیاسییەکان لە کۆمیسیۆنی باڵای هەڵبژاردنەکانی عێراق لە کۆنگرەدا ئامادەبن؛ بەرپرسەکەی بزووتنەوەی گۆڕان گوتی، "مۆدێلی بزووتنەوەی گۆڕان بەشێوەیەکە کە ئەندامانی خانەی راپەڕاندن (لە حیزبەکانی دیکەدا ئەندامی سەرکردایەتین) و رێکخەری گشتی لە کۆنفرانسدا هەڵنابژێردرێن و جڤات هەڵیاندەبژێرێت، ئەمەش بۆ کۆمیسیۆن نامۆیە؛ بۆ چارەسەرکردن و لێکتێگەیشتن لەگەڵ کۆمیسیۆن لە گفتوگۆداین و دۆسیەکە بە کراوەیی ماوەتەوە".
بەگوێرەی زانیارییەکانی تۆڕی میدیایی رووداو، بۆ چارەسەرکردنی کێشە یاساییەکانی بزووتنەوەی گۆڕان و کۆمیسیۆن، ئەگەر هەیە بزووتنەوەی گۆڕان پێش هەڵبژاردنی ئەندامانی خانەی راپەڕاندن و رێکخەری گشتی، بزووتنەوەکە کۆنفراسێک بە ئامادەبوونی کۆمیسیۆنی هەڵبژاردنەکان ببەستێت، بەڵام ئەمەش یەکلانەکراوەتەوە.
تاوەکو 28ـی ئەم مانگە هۆشیار عەلی، رێكخەری ژووری پەیوەندییە دیپلۆماسییەكانی بزووتنەوەکە و نزار مەحموود، ئەندامی جڤاتی نیشتمانیی بزووتنەوەی گۆڕان خۆیان بۆ پۆستی رێکخەری گشتیی بزووتنەوەی گۆڕان بەربژێر کردبوو.
ئەندامانی خانەی راپەڕاندن پێکدێن لە رێکخەری گشتی، سکرتێری کاروباری جڤاتی نیشتمانی، سکرتێری کاروباری فراکسیۆنەکان، سکرتێری کاروباری ژوورەکان، سکرتێری کاروباری باژێڕەکان، سکرتێری کاروباری خەڵک، سەرۆکی جڤاتی نیشتمانی، رێکخەری گشتی و ئەندامانی خانەی راپەڕاندن، کە دوو ساڵ جارێک هەڵدەبژێردرێن، بۆشیان هەیە بۆ سێ خولی هەڵبژاردن خۆیان هەڵبژێرن.
دوای ئەوەی لە دوای دروستبوونی بزووتنەوەکەوە بۆ یەکەم جار لە هەڵبژاردنی پەرلەمانی عێراقدا کە لە 10-10-2021 لە عێراق و هەرێمی کوردستان بەڕێوەچوو هیچ کورسییەکیان بەدەستنەهێنا، 13-10-2021 رێکخەری گشتی و ئەندامانی خانەی راپەڕاندنی بزووتنەوەی گۆڕان دەستیان لەکارکێشایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ