هەڵەیەک روویدا! دووبارە هەوڵبدە
رووداو دیجیتاڵ
قایمقامی هەولێر دەڵێت، دەستیان بەسەر گۆشتفرۆشێکدا گرت بە نایاسایی ئاژەڵی کێوی (رێوی) سەربڕیوە و گۆشتەکەی بە هاونیشتمانیان فرۆشتووە، بەو هۆیەوە شوێنەکە داخرا.
رۆژی چوارشەممە، 31ـی کانوونی یەکەمی 2025، نەبەز عەبدولحەمید، قایمقامی هەولێر بە تۆڕی میدیایی رووداوی راگەیاند: "لە چوارچێوەی کارەکانی لیژنە هاوبەشەکانی قایمقامیەت و هەڵمەتی بەردەوامی پشکنین و چاودێریکردنی بازاڕ، شوێنێک بە ناوی گۆشتفرۆشی (باوکی حیکمەت) بە نهێنی و بەدەر لە یاسا، رێویی سەربڕیوە و گۆشتەکەی فرۆشتووە بە هاووڵاتییان".
نەبەز عەبدولحەمید گوتی، ئەم ئاژەڵە موڵکی سرووشتی کوردستانە، بۆیە سەربڕینی ئەو جۆرە ئاژەڵانە رێگەپێدراو نیین: "شوێنەکە داخراو و رێکاری یاسایی بەرامبەر خاوەنەکەی و ئەو کەسانەشی لەو شوێنە کاریان دەکرد گیرایەبەر".
قایمقامی هەولێر روونیکردەوە، ئەو جۆرە ئاژەڵانە کێوین و بە هیچ شێوەیەک رێگەپێدراو نییە بۆ سەربڕین و فرۆشتن، چونکە جگە لەوەی سەرپێچییەکی ژینگەییە، لە رووی تەندروستی و ڤێتێرنەریشەوە مەترسی بۆ سەر تەندروستیی گشتی دروست دەکات.
قایمقامیەتی ناوەندی هەولێر جەخت دەکاتەوە هەڵمەتەکانیان بۆ چاودێریکردنی بازاڕ و پاراستنی سەلامەتیی هاونیشتمانیان بەردەوام دەبێت و هەر شوێنێک پابەندی رێنماییەکان نەبێت، سزای یاسایی دەدرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ