رووداو دیجیتاڵ
بەرپرسێکی زانکۆی ئازاد کە زانکۆیەکی ناحکومییە لە ئێران رایگەیاند، بەهۆی هێرشەکانی ئەمریکا و ئیسرائیلەوە 42 خوێندکار و مامۆستای زانکۆکە لە شارە جیاوازەکانی ئێران کوژراون.
ئەمڕۆ چوارشەممە، 11ی ئاداری 2026، فەرزاد جەهان، جێگری سەرۆکی زانکۆی ئازاد بۆ کاروباری کولتووری و خوێندکاران ئامارێکی لەبارەی کاریگەرییەکانی شەڕ لەسەر زانکۆکە بڵاوکردەوە و رایگەیاند، لە سەرەتای شەڕەوە تاوەکو ئێستا بە گشتیی 39 خوێندکاری زانکۆ لە 15 پارێزگا بەهۆی بۆردوومانەکانی ئەمریکا و ئیسرائیل کوژراون.
فەرزاد جەهان دەڵێت، زیاترین قوربانی لە پارێزگای تاران بووە و 9 خوێندکاری زانکۆ لەو پارێزگایە گیانیان لەدەستداوە، پارێزگاکانی ئیسفەهان و فارس بە کوژرانی 7 خوێندکاری زانکۆ لە ریزی دووەم و سێیەمدان.
بە گوتەی جەهان، لە هەر کام لە پارێزگاکانی تەورێز و کرماشان 3 خوێندکار، لە ورمێ، زەنجان و کوهگیلۆیە و بویەرئەحمەد 2 خوێندکار و لە هەر یەک لە پارێزگاکانی خوزستان، سمنان، قوم، گیلان، لوڕستان، مەرکەزی و هەمەدانیش خوێندکارێکی زانکۆ لە هێرشەکانی ئەمریکا و ئیسرائیلدا کوژراون.
بەرپرسەکەی زانکۆی ئازاد هەروەها دەڵێت، لە هێرشەکاندا تاوەکو ئێستا 3 مامۆستای زانکۆش گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ