رووداو دیجیتاڵ
لە هەڵبژاردنی پەرلەمانی عێراق کە بڕیارە رۆژی 11ـی تشرینی دووەم بکرێت، 9 بەربژێری کاکەیی کێبڕکێ لەسەر بەدەستهێنانی کورسیی پەرلەمان دەکەن.
ئەو 9 بەربژێرە کاکەییە لەسەر لیستەکانی پارتی دیموکراتی کوردستان و یەکێتیی نیشتمانیی کوردستانن لە پارێزگاکانی کەرکووک، نەینەوا و دیالە.
هۆشیار کاکەیی، ئەندامی ئەنجوومەنی پارێزگای کەرکووک، بە تۆڕی میدیایی رووداوی راگەیاند، سێ لە بەربژێرەکان لە پارێزگای کەرکووکن، سێ دیکەیان لە پارێزگای نەینەوان و سێیەکەی دیکە لە پارێزگای دیالەن.
بەربژێرەکانی کەرکووک بریتین لە: حەسەن سەفەر، لەسەر لیستی یەکێتی، نەجوا حەمید و هانا بەهجەت لە لیستی پارتی.
بەگوێرەی یاسای هەڵبژاردن، لە کۆی 329 کورسیی پەرلەمان، 13 کورسی بۆ پارێزگای کەرکووک تەرخانکراوە، کە یەکێکیان بۆ پێکهاتەی کریستیانە و سێ کورسیش کۆتای ژنانە.
لە نەینەوا، هەریەک لە ئەحلام رەمەزان و غازی فەیسەڵ لەسەر لیستی یەکێتی و غازی خەلیل لەسەر لیستی پارتی بەربژێرن. نەینەوا بە 34 کورسییەوە، دووەم گەورەترین پارێزگای عێراقە لە رووی ژمارەی کورسییەکانی پەرلەمانەوە.
لە پارێزگای دیالە و بەدیاریکراوی لە قەزای خانەقین، سوهاک فەخرەدین، عەدنان ئەنوەر و ئەرکان حەیدەر، کە هەر سێکیان لەسەر لیستی یەکێتین، کێبڕکێ لەسەر 14 کورسییەکەی پەرلەمان دەکەن کە بۆ ئەو پارێزگایەی رۆژهەڵاتی عێراق تەرخانکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ