رووداو دیجیتاڵ
لە بەغدا رێکارە ئەمنییەکان گەیشتوونەتە "ئەوپەڕی ئامادەیی" و هێزێکی زۆری ئەمنی رەوانەی دەوروبەری ناوچەی سەوز کراوە. ئەوەش دوای بانگەوازی گرووپە چەکدارەکان بۆ خۆپێشاندان لە دژی باڵیۆزخانەی ئەمریکا لە کاژێر 08:00ی ئەمشەو.
ئەمڕۆ دووشەممە، 2ی ئاداری 2026، هێزە ئەمنییەکان دەستیان کردووە بە دانانی بەربەستی کۆنکرێتی لەسەر "پردی هەڵواسراو" و دەوروبەری، وەک هەنگاوێکی خۆپارێزی بۆ رێگری لە هەر ئەگەرێکی نەخوازراو و پاراستنی دەروازەکانی ناوچەی سەوز.
گرووپە چەکدارەکان و لایەنگرانی حەشدی شەعبی لە تۆڕە کۆمەڵایەتییەکاندا بانگەوازێکیان بڵاوکردووەتەوە. لەو بانگەوازەدا داوا لە لایەنگرانیان دەکەن کاژێر 08:00ی ئەمشەو لە بەردەم "پردی هەڵواسراو" کۆببنەوە.
لە بەشێکی بانگەوازەکەدا کە ئاڕاستەی لایەنگرانیان کراوە، هاتووە: "خوێنی رابەرمان هێشتا وشک نەبووەتەوە.. ئەمشەو کاژێر 8 لەسەر پردی هەڵواسراو بن بۆ پشتگیریکردنی شەهیدەکەمان و لە ئامادەبوون کەمتەرخەم مەبن."
ئەم جموجۆڵە ئەمنییانە لە کاتێکدایە کە گرژییەکانی نێوان تاران و واشنتن بەهۆی کوژرانی عەلی خامنەیی، رێبەری پێشووی کۆماری ئیسلامیی ئێران، گەیشتووەتە لووتکە. هێزە ئەمنییەکانی عێراق مەترسی ئەوەیان هەیە خۆپێشاندەران هەوڵی چوونە ناو ناوچەی سەوز و هێرشکردنە سەر باڵیۆزخانەی ئەمریکا بدەن.
بەهۆی تێکچوونی بارودۆخی ئەمنی و ئەگەری دروستبوونی پێکدادان، باڵیۆزخانەی ئەمریکا لە بەغدا هۆشداریی داوەتە هاووڵاتییانی وڵاتەکەی. باڵیۆزخانەکە داوای لە ئەمریکییەکان کردووە لە شوێنەکانی خۆیان بمێننەوە و بەهیچ شێوەیەک لە ناوچەی سەوز و پردی هەڵواسراو و ئەو شوێنانەی خۆپێشاندانی تێدا دەکرێت، نزیک نەبنەوە.
ئێستا ئاستی ئامادەباشی لە دەوروبەری باڵیۆزخانەکان بەرزکراوەتەوە و هێزە ئەمنییەکان لە چاودێرییەکی وردی مەیدانیدان بۆ رێگری لە هەر جۆرە پێشێلکارییەک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ