هەڵەیەک روویدا! دووبارە هەوڵبدە
رووداو – هەولێر
بڕیارە هاوپەیمانیی چوارچێوەی هاوئاهەنگی کۆببێتەوە و تاوتوێی دۆخی ئێستای عێراق و ناوچەکە و پرسە نێوخۆییەکان بکات.
رۆژی سێشەممە، 3ـی ئاداری 2026، سەباح ساڵحی، ئەندامی مەکتەبی جێبەجێکردنی رەوتی حیکمە بە تۆڕی میدیایی رووداوی گوت: "بڕیارە کاژێر چواری ئێوارەی ئەمڕۆ هاوپەیمانیی چوارچێوەی هاوئاهەنگی لە ماڵی محەممەد شیاع سوودانی کۆببێتەوە."
سەباح ساڵحی رایگەیاند، بڕیارە لە کۆبوونەوەکەدا تاوتوێی دۆخی ناوچەکە و چۆنێتیی دەربازکردنی عێراق بکرێت لەو تەنگژەیەی ئێستا، هەروەها باس لە تاوتوێکردنی رێکارەکان دەکرێت بۆ بەربژێری پۆستی سەرۆکوەزیران.
هاوپەیمانیی چوارچێوەی هاوئاهەنگی 12 لایەنی سەرەکیی هاوپەیمانیی شیعەکان لەخۆدەگرێت کە زۆرینەی پەرلەمانییان بەدەستەوەیە و نووری مالیکییان بۆ پۆستی سەرۆکوەزیران بەربژێر کردووە.
عەقیل ردێنی، گوتەبێژی هاوپەیمانیی نەسر بە رووداوی رایگەیاند، بڕیار بوو کۆبوونەوەی بەڕێوەبردنی دەوڵەت بکرێت، بەڵام بەهۆی دۆخی ئێستاوە نەکرا، گوتیشی: "کۆبوونەوەی چوارچێوەی هاوئاهەنگی گرنگە بۆ چارەسەرکردنی ئاڵۆزییە سیاسی و ئەمنییەکان و بارودۆخی ناوچەکە".
کۆبوونەوەکەی چوارچێوەی هاوئاهەنگی لە کاتێکدایە، کە پرۆسەی سیاسیی لە عێراق چەقی بەستووە، ئەمەش دوای ئەوەی چوارچێوەکە نوری مالیکی بۆ پۆستی سەرۆکوەزیران بەربژێر کرد، بەڵام ئەمریکا دژی بەربژێرکردنیەتی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ