دیمەنێکی نێو پەرلەمانی عێراق لەکاتی دروستبوونی گرژییەکان و ساتی هێرشێک بۆسەر باڵیۆزخانەی ئەمریکا لە بەغدا
رووداو دیجیتاڵ
پەرلەمانی عێراق شەوی رابردوو بە مەبەستی تاوتوێکردنی دۆخی عێراق و دوایین پێشهاتەکانی ناوچەکە، بە ئامادەبوونی فەرماندە باڵا سەربازی و ئەمنییەکانی عێراق کۆبووەوە. پەرلەمانتارانی نزیک لە گرووپە چەکدارەکانی عێراق دەرفەتەکەیان قۆستەوە، بۆ ئەوەی دروشمی دژی ئەمریکا و ئیسرائیل بدەن، هەروەها پەسنی ئەو هێزانە بکەن نزیکەی هەفتەیەکە هێرشی درۆنی دەکەنە سەر هەرێمی کوردستان و چەند ئامانجێکی دیکە لە عێراق. هەمان شەو، هێرش کرایە سەر باڵیۆزخانەی ئەمریکا لە بەغدا و ئەوەش کاردانەوەی حکومەتی بەدوادا هات.
پەسنی هێزەکانی (موقاوەمە) لە کۆبوونەوەی پەرلەمانی عێراق
وەک سەرۆکایەتیی پەرلەمانی عێراق بڵاوی کردبووەوە، کاتی دەستپێکردنی کۆبوونەوەکە کاژێر 9:00ی شەو بوو. نزیکەی کاژێر 9:30 کۆبوونەوەکە دەستی پێکرد.
د. دانەر عەبدولغەفار، گوتەبێژی فراکسیۆنی پارتی دیموکراتی کوردستان لە پەرلەمانی عێراق، ئەمڕۆ یەکشەممە بە تۆڕی میدیایی رووداوی راگەیاند، "لە کۆبوونەوەکەدا کۆمەڵێک فەرماندەی سەربازیی ئامادە بوون، لەنێویاندا سوپاسالاری عێراق. ئەو جەنگەی ئێستا هەیە خرایەڕوو، سیستم و تواناکانی عێراق لە رووبەڕوونەوە باسی لێوەکرا."
هەرزوو لە کۆبوونەوەکەدا کۆمەڵێک فەرماندەی سەربازیی ئامادە بوون، لەنێویاندا سوپاسالاری عێراق. ئەو جەنگەی ئێستا هەیە خرایەڕوو، سیستم و تواناکانی عێراق لە رووبەڕوونەوە باسی لێوەکرا، هەموو لایەک کۆکین لەسەر ئەوەی دەبێ عێراق لەو شەڕە بپارێزرێت.
هەر زوو پەرلەمانتارانی نزیک لە حەشدی شەعبی لەنێو هۆڵی پەرلەمان دەستیان بە گوتنەوەی درووشم دژی ئەمریکا و ئیسرائیل کرد و ستایشی ئەو هێزانەیان کرد خۆیان بە (بەرەی موقاوەمە) دەناسێنن.
شێروان دووبەردانی، پەرلەمانتاری فراکسیۆنی پارتی دیموکراتی کوردستان، ئەمڕۆ یەکشەممە بە تۆڕی میدیایی رووداوی راگەیاند، نزیکەی 220 پەرلەمانتار ئامادەی کۆبوونەوەکە بوون و کاتی دەستکردن بە گوتنەوەی دروشم و پیاهەڵدانەکان، سوننەکان، کوردەکان و بەشێکی شیعەکانیش بێدەنگ بوون.
محەممەد ئەبو عەیس، یەکێک لە پەرلەمانتارانی فراکسیۆنی سادیقوون هاواری کرد، "مەرگ بۆ بەکرێگیراوان...مەرگ بۆ ئەمریکا... مەرگ بۆ ئیسرائیل. بەڵێ بۆ مقاوەمە."
دۆخەکە هەر لەوێ کۆتایی نەهات. فراکسیۆنی سادیقوونی سەر بە بزووتنەوەی عەسائیبی ئەهلی حەق بە سەرۆکایەتیی قەیس خەزعەلی داوای هەڵوێستی لە حکومەتی عێراق کرد.
فراکسیۆنەکە خاوەنی 27 کورسی پەرلەمانی عێراقە و جێگری سەرۆکی پەرلەمانیش ئەندامی ئەو فراکسیۆنەیە.
عودەی عەواد، سەرۆکی فراکسیۆنی سادیقوون رایگەیاند، "بە تووندترین شێوە سەرکۆنەی ئەو هێرش و پەلامارە زەقە دەکەین کە هەیە و لێکەوتەکانی دەکەوێتە ئەستۆی هێرشکاران و ئیدارەی ئەمریکا و قەوارەی زایۆنی. دەستی گەلی مەزنی ئێرانی دەگوشین و ستایشیان دەکەن کە یەکێتی نیشتمانییان بەدیهێناوە و لە دەوری سەرکردایەتی نوێ کۆبوونەتەوە، تاوەکو ببنە بەربەرستێکی بەهێز لەبەردەم پیلانگێڕییەکان".
عودەی عەواد داوای لە حکومەتی عێراق و پەرلەمان کرد، "هەڵوێستێکی فەرمی بەهێزیان هەبێت لەبەرامبەر ئەم هێرش و پەلامارە، هەروەها رێڕەوی مرۆیی بۆ ئێران بکرێتەوە."
د. موسەنا ئەمین، سەرۆکی فراکسیۆنی یەکگرتووی ئیسلامیی کوردستان لە پەرلەمانی عێراق ئەمڕۆ یەکشەممە بە تۆڕی میدیایی رووداوی گوت، "روونە ئەوانەی دروشمیان گوتەوە حەشد بوون."
شەڕ لەنێوان پەرلەمانتارێکی نزیک لە حەشد و پەرلەمانتارێکی فراکسیۆنی سوودانی
هەر لەنێو پەرلەمانی عێراقدا شەڕ لەنێوان مستەفا سەنەد، ئەندامی پەرلەمانی عێراق لە فراکسیۆنی (ئەبشر یا عێراق) کە لە حەشدی شەعبییەوە نزیکە و بەها ئەعرەجی، سەرۆکی فراکسیۆنی ئاوەدانکردنەوە و گەشەپێدانی محەممەد شیاع سوودانی دروستبوو.
سەنەد رەخنەی لە سوودانی گرت لە بەرامبەر ئەوەی، وەک خۆی دەڵێ، هەڵوێستی روونی نەبووە لەبارەی ئەو دۆخەی کە ئێستا لە ناوچەکەدا هەیە. سەنەد زلـلەیەکی لە بەها ئەعرەجی دا.
هەیبەت حەلبووسی، سەرۆکی پەرلەمانی عێراق، بڕیاری دا رێگە نەدات مستەفا سەنەد، بەشداریی کۆبوونەوەکان بکات تاوەکو پۆزش بۆ سەرۆکایەتیی پەرلەمان و سەرۆکی فراکسیۆنەکەی سوودانی نەهێنێتەوە.
خەلیلزاد بۆ پەرلەمانتارانی عێراق: ئەمریکا نەبووایە، ئێستا لە کوێ دەبوون؟
زاڵمای خەلیلزاد، باڵیۆزی ئەمریکا لە ساڵی 2005-2007 پەیامێکی ئاراستەی هەندێک لە پەرلەمانتارانی عێراق کرد و گوتی: "ئەگەر وڵاتەکەم دەسەڵاتی سەدام حوسێنی نەڕووخاندایە، ئێوە ئێستا لەوێ دەبوون؟"
زاڵمای خەلیلزاد لە تۆڕی کۆمەڵایەتیی ئێکس نووسی: "دیمەنێک لە پەرلەمانی عێراق بڵاوبووەوە کە تێیدا ژمارەیەک پەرلەمانتار هاواری مردن بۆ ئەمریکا دەکەن. ئەگەر ئەمریکا لە ساڵی 2003 سەدام حوسێنى نەڕووخاندایە، ئێستا ئەمانە لە کوێ دەبوون؟"
هێرشکردنە سەر باڵیۆزخانەی ئەمریکا لە بەغدا
هەر دوێنێ شەو، هێرش کرایە سەر باڵیۆزانەی ئەمریکا لە عێراق.
سەرچاوەیەکی ئەمنی بە ئاژانسی فرانس پرێسی گوت: "4 رۆكێت بە ئاراستەی باڵیۆزخانەی ئەمریکا تەقێندران" و سێ دانەیان لە لایەن سیستمی دژە مووشەکیی باڵیۆزخانەکەوە تێکشکێندران و ئەوی دیکەش لە ناوچەیەک لە نزیک باڵیۆزخانەکە کەوتەخوارەوە.
هێرشەکە لە کاتێکدایە، لە رۆژانی رابردوودا دەیان جار بە درۆن هێرش کراوەتە سەر هەرێمی کوردستان، بە تایبەتی ئەو شوێنانەی ئەمریکای لێیە، وەک فڕۆکەخانەی نێودەوڵەتیی هەولێر و کۆنسووڵگەری ئەمریکا.
حکومەتی عێراق هەموو هەوڵی خۆی دەدات پەلكێشی ئەو جەنگە نەکرێت لە رۆژی شەممەی رابردوو 28-2-2026ەوە لەنێوان ئەمریکا و ئیسرائیل لەگەڵ ئێران هەڵگیرساوە.
هەربۆیە محەممەد شیاع سوودانی، سەرۆکوەزیرانی عێراقیش هەر زوو هاتە سەر هێڵ. سوودانی کە هاوکات فەرماندەی گشتیی هێزە چەکدارەکانی عێراقە، فەرمانی بە دەزگا ئەمنییەکان کرد ئەو کەسانە دەستگیربکەنکە هێرشیان کردووەتە سەر باڵیۆزخانەی ئەمریکا لە بەغدا.
سەباح نوعمان، گوتەبێژی فەرماندەی گشتیی هێزە چەکدارەکانی عێراق لە راگەیێندراوێکدا گوتی، سوودانی فەرمانی داوە بە هەموو فەرماندە سەربازی و ئەمنییەکان لە سنووری بەرپرسیارێتیی خۆیاندا " ئەنجامدەرانی ئەو کارە تیرۆریستییە بدۆزنەوە کە مووشەکیان ئاراستەی دەوروبەری باڵیۆزخانەی ئەمریکا کردووە و رادەستی دادگەیان بکەن."
بەپێی راگەیێندراوەکە، سوودانی دووپاتی کردووەتەوە کە بە ئامانجگرتنی نێردە دیپلۆماسییەکان و باڵیۆزخانەکان لە عێراق، کارێکی "پاساو هەڵنەگرە" و لە هیچ دۆخێکدا قبووڵ ناکرێت؛ ئاماژەی بەوەش کردووە کە ئەم جۆرە کارانە زیان بە ئاسایشی نیشتمانی و سەقامگیریی وڵات دەگەیێنن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ