عێراق
بە گوتەی گوتەبێژی وەزارەتی پلاندانان، سیستمەکە هەموو دامەزراوەکانی سەر بە وەزارەتەکە دەگرێتەوە
رووداو دیجیتاڵ
وەزارەتی پلاندانانی عێراق دەڵێت، سیستمی شوێنپێهەڵگرتنی ئۆتۆمبێل (GPS) لە سەرجەم بەڕێوەبەرایەتییەکانی سەر بە وەزارەت لە پارێزگاکانی عێراق کارا دەکرێت.
عەبدولزەهرە هینداوی، گوتەبێژی وەزارەتی پلاندانانی عێراق بە تۆڕی میدیایی رووداوی راگەیاند، "لە چوارچێوەی هەوڵەکانمان بۆ بەسیستمکردنی کارگێڕی تەکنەلۆژی، کاراکردنی سیستمی شوێنپێهەڵگرتنی ئۆتۆمبێل (GPS) لە بەڕێوەبەرایەتییەکانی وەزارەتەکەمان لە پارێزگاکانی عێراق ئەنجامدەدرێ. کارە تەکنیکییەکانیش بۆ ئەو مەبەستە کراون."
گوتەبێژی وەزارەتی پلاندانانی عێراق گوتیشی، "تیمێکی تەکنیکی بە هاوئاهەنگی بەشی کاروباری کارگێڕیی وەزارەت، دەستی بە جێبەجێکردنی پرۆسەی کاراکردنی جی پی ئێس بۆ ئۆتۆمبێلەکانمان کردووە."
عەبدولزەهرە هینداوی ئاماژەی بەوەش کرد، جگە لە سوودە کارگێڕی، دارایی، تەکنیکی و ئەمنییەکانی، "ئەم سیستمە یارمەتیدەر دەبێ کە لە کاتی بوونی کێشەی تەکنیکی لە ئۆتۆمبێلەکان لە هەر شوێنێک، تیمەکانی فریاکەوتن بتوانن بە خێرایی بگەنە شوێنەکە، یان لە کاتی دزینی ئۆتۆمبێلەکانی وەزارەتدا بە ئاسانی شوێنەکانیان بدۆزینەوە."
بە گوتەی گوتەبێژەکەی وەزارەت، سیستمەکە هەموو دامەزراوەکانی سەر بە وەزارەتی پلاندانان لە سەرجەم پارێزگاکانی عێراق دەگرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ