رووداو دیجیتاڵ
موقتەدا سەدر، رێبەری رەوتی نیشتمانیی شیعە، هۆشداری دا لە بەرزکردنەوەی نرخی پێداویستییەکان و قۆستنەوەی بازاڕ لە مانگی رەمەزانی پیرۆزدا.
سەدر لە هەژماری فەرمیی خۆی لە (ئێکس) رایگەیاند: "لە کاتێکدا بەرەو مانگی رەحمەت و میوانی خودا (مانگی رەمەزان) دەچین، نابێت ئەم مانگە پیرۆزە بۆ دەستکەوتی دنیایی و بە شێوازێکی دوور لە رەحمەت بەکاربهێندرێ."
هۆشداری لە گرانکردنی خواردن و ئاو و کارەبا
سەدر دەڵێ "نابێت یاری بە نرخ بکرێت و گران بکرێن، بەتایبەت ئەوەی پەیوەندی بە خواردن و خواردنەوە و پێویستییەکانی ژیانی رۆژانەوە هەیە وەک کارەبا و ئاو، چونکە ئەوە دەبێتە هۆی بێبەشکردنی هەژاران و کەم دەرامەتان کە قوتی رۆژانەیان نییە."
هەروەها ئاماژەی بەوە کرد: "بە تێگەیشتنی من، هەرکەسێک بە ستەم نرخ گران بکات، ئەوە دووژمنی رۆژوو و رۆژووگران و کارە چاکەکانە."
سەدر چەندین ئایەتی قورئانی پیرۆزی وەک بەڵگە هێناوەتەوە کە هانی مرۆڤ دەدەن بۆ بەخشین و دوورکەوتنەوە لە چاوبرسێتی و رەزیلی.
پەیام بۆ سەرمایەداران
رێبەری رەوتی نیشتمانیی شیعە داوا لە سەرمایەداران دەکات بایەخ بە کەسانی کەم دەرامەت و خاوەن پێداویستی تایبەت بدەن و هەر لەم بارەیەوە فەرموودەیەکی پێغەمبەری ئیسلام (د.خ) هێناوەتەوە کە دەفەرموێت: "خۆتان لە ئاگر بپارێزن تەنانەت بە بەخشینی لەتە خورمایەک یان بە قومێک ئاو."
لە کۆتاییدا دەڵێ، هاوکاریکردنی هەژاران "بازرگانییەکە کە هەرگیز تیاچوون و زیانی نییە"، وەک چۆن قورئانی پیرۆز ئاماژەی پێ کردووە.
لە هەرێمی کوردستان و لای سوننەکانی عێراق، 18ـی شوباتی 2026 یەکەم رۆژی مانگی رەمەزانە، شیعەکانیش نەیانکردووەتە رەمەزان، موقتەدا سەدر داوای لەخەڵک کردووە ئێوارەی ئەمڕۆ چوارشەممە هەر کەسێ مانگی بینی پەیوەندییان پێوەبکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ