رووداو دیجیتاڵ
پۆلیسی تکریت 10 کەسی بە تۆمەتی هێرشکردنە سەر کارمەندێکی نەخۆشخانەی گشتیی شارەکە دەستگیرکرد. دەستگیرکردنەکە دوای ئەوە هات کە ژمارەیەکی زۆر کەس لەگەڵ نەخۆشێکدا چوونە نەخۆشخانە و دوای رێگری لێکردنیان، هێرشیان کردە سەر کارمەندێکی نەخۆشخانەکە.
جەمال عەگاب، گوتەبێژی پارێزگای سەڵاحەدین، ئەمڕۆ چوارشەممە، 24-12-2025 بە تۆڕی میدیایی رووداوی راگەیاند: "کاژێر 11:00ـی شەوی رابردوو، گەنجێکی تەمەن 15 ساڵ کە لە رووداوێکی هاتووچۆدا بریندار ببوو، گوێزرایەوە بۆ بەشی بووژاندنەوەی دڵ لە نەخۆشخانەی فێرکاریی تکریت."
جەمال عەگاب گوتی: "منداڵەکە سەر بە هۆزی عیزەیە و کەسێکی هۆزی شەمەریش بە ماتۆرسکیل لێی دابوو. کەسوکاری هەردوولا لە نەخۆشخانە کۆببوونەوە. بەپێی رێنماییەکان، نابێت هاوەڵی نەخۆش لە 2 کەس زیاتر بێت، بۆیە لەگەڵ کارمەندی پرسگە تووشی دەمەقاڵێ بوون."
گوتەبێژی پارێزگای سەڵاحەدین گوتی: "ئەوەی لە تۆڕە کۆمەڵایەتییەکان باس دەکرێ کە گوایە نزیکەی 250 کەس لەگەڵ نەخۆشەکەدا بوون، دوورە لە راستییەوە. ژمارەی ئەو کەسانە نزیکەی 10 کەس بوو و کاتێکیش کارمەندێکی نەخۆشخانەکە هەوڵیدا رێگری لە چوونەژوورەوەی زیاتری کەسوکاری نەخۆشەکە بکات، لەلایەن ژمارەیەک لەوانەوە هێرشی کرایە سەر."
جەمال عەگاب گوتی: "دۆخەکە لەلایەن بەڕێوەبەری نەخۆشخانەکەوە کۆنترۆڵکرا. زیاتر لە 10 کەس لە بنکەی پۆلیسی تکریت بەمەبەستی لێکۆڵینەوە دەستبەسەرکران و ئەمڕۆ گوتەیان لە بەردەم دادوەردا لێوەرگیرا، بە کەفالەت ئازاد کران و تەندروستیی کارمەندەکەی نەخۆشخانەش جێگیرە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ