هەڵەیەک روویدا! دووبارە هەوڵبدە
رووداو دیجیتاڵ
فێستیڤاڵی هەنار و پاییزی هەڵەبجە دەستیپێکرد، بانگەشەی هەڵبژاردن لە فێستیڤاڵەکەدا قەدەخەکراوە؛ هەر بەربژێرێک بانگەشە بکات وەکو سەرپێچی تۆمار دەکرێت و دەدرێتە کۆمیسیۆن.
ئەمڕۆ پێنجشەممە، ئەم ساڵ 11ـەمین ساڵە فێستیڤاڵی هەنار لە هەڵەبجە بەڕێوەدەچێت، ئەم خولەی فێستیڤاڵەکە هاوشێوەی ساڵی رابردوو لە پارک و شاری یاریی هەڵەبجە بەڕێوەدەچێت، ئامادەکارییەکان لەلایەن لیژنەیەکی باڵای چوار کەسییەوە سەرپەرشتی کراون. بەهۆی فێستیڤاڵەکەوە رۆژی پێنجشەممە لە هەڵەبجە کراوەتە پشووی فەرمیی و بڕیارە فێستیڤاڵەکە دوو رۆژی دیکەش بەردەوام بێ.
سمکۆ ساڵح، قایمقامی هەڵەبجە، ئەمڕۆ بە تۆڕی میدیایی رووداوی راگەیاند: "لە چوارچێوەی رێنوێنییەکانی کۆمیسیۆن، بانگەشە لە پارک، کڵێسا، مزگەوت و هەموو دامەزراوەکانی حکومەت قەدەخەیە، بۆیە بە هیچ شێوەیەک رێگەپێدراو نییە کە لەم فێستیڤاڵەدا بانگەشەی حیزبەکان بۆ هەڵبژاردن بکرێت."
بە گوتەی سمکۆ ساڵح، دەبێت فێستیڤاڵەکە بێلایەن و سەربەخۆ بێت تاوەکو هەموو کەسێک بتوانێت سەردانی بکات، چونکە گشتییە بۆ هەموو خەڵکە، بۆ هەر چوارپارچەی کوردستانە و پەیوەندیی بە سیاسەتەوە نییە.
لەبارەی ئەو کەسانەی سەرپێچی دەکەن، قایمقامی هەڵەبجە دەڵێت: "لەلایەن لێژنە ئەمنییەکانەوە بەردەوام چاودێریی فێستیڤاڵەکە دەکرێت، ئەگەر بەربژێر لەوێ بانگەشە بکات، دەدرێتە کۆمیسیۆن؛ ئەگەر هاووڵاتییش بن، ئەو لایەنە بەرپرسە بانگەشەی بۆ دەکەن."
لە فێستیڤاڵەکەدا، لە 650 دووکاندا، هەنار و هەموو بەرهەمە خۆماڵییەکان و کاری دەستی خراونەتەڕوو، کە 250 دووکانیان تایبەتن بە فرۆشتنی هەنار و بەرهەمە پاییزییەکانی دیکە.
ساڵی رابردوو لە 31ی مانگی 10، فێستیڤاڵی هەناری هەڵەبجە بەڕێوەچوو و سێ رۆژی خایاند. بەگوێرەی ئاماری وەزارەتی کشتوکاڵی هەرێمی کوردستان، بەرهەمی ساڵانەی هەناری هەرێمی کوردستان زیاتر لە 80 هەزار تۆنە، نزیکەی 30 هەزاری لە پارێزگای هەڵەبجەیە.
رۆژی 03-10-2025، بانگەشەی هەڵبژاردن لە هەرێمی کوردستان و عێراق دەستیپێکرد، رۆژی شەممە 8-11-2025 بانگەشە کۆتایی دێت، لیست و هاوپەیمانییەتی و بەربژێرە سەربەخۆکان پاش پێنج هەفتە بانگەشە دەچنە نێو رکابەریی کۆکردنەوەی دەنگی خەڵک لە دەنگدانی گشتی و تایبەتدا. دەنگدانی تایبەت لە 09-11-2025 و دەنگدانی گشتیش لە 11-11-2025 دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ