رووداو - هەولێر
شاندێکی هاوبەشی پارتی دیموکراتی پێشڤەڕۆ، ئەنجوومەنی سووریای دیموکرات - مەسەدە و بەڕێوەبەرایەتیی خۆسەر لە دیمەشق لەگەڵ بەرپرسانی حکومەتی سووریا کۆبوونەوە و گفتوگۆیان دەربارەی چەند پرسێک کرد.
بەدران چیا کورد، ئەندامی شاندەکە و راوێژکاری بەڕێوەبەرایەتیی خۆسەر بە تۆڕی میدیایی رووداوی راگەیاند، تاوەکو ئێستا هیچ رێککەوتنێک لەگەڵ بەرپرسانی حکومەتی سووریا نەکراوە، بەڵام لەسەر چەند پرسێک گفتوگۆیان کردووە و دەیانەوێ کەشێکی باش بۆ کۆبوونەوەیەکی جیدی و فەرمی لەگەڵ دیمەشق بێتە ئاراوە.
ئەو ئەندامەی شاندەکە ئاماژەی بەوەش کرد، کۆبوونەوەی باش بەڕێوەدەچن و هیوادارن ئەنجامی باشیان هەبێت و هەموو شت لە بەرژەوەندیی خەڵکی ناوچەکەدا بێت.
ئەو شاندەی کە لە رۆژئاوای کوردستانەوە سەردانی دیمەشقی کرد پێکهاتبوو لە ئیلهام ئەحمەد، هاوسەرۆکی دەستەی جێبەجێکاری مەسەدە، بەدران چیا کورد، راوێژکاری بەڕێوەبەرایەتیی خۆسەر و ئەحمەد سلێمان، ئەندامی مەکتەبی سیاسیی پارتی دیموکراتی پێشڤەڕۆی کورد.
سەردانی شاندە هاوبەشەکە لەکاتێکدایە کە پێش سێ رۆژ لە حمێمیم لەگەڵ بەرپرسانی سەربازیی رووسی کۆبووبوونەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ