چەند دیمەنێکی نوێی عەفرین کە بەتایبەت بۆ رووداو نێردراون
رووداو دیجیتاڵ
سەرەتای ڤیدیۆکە چەند دیمەنێکی عەفرین دەبینن کە لەلایەن هاونیشتمانییەکەوە سەرەتای ئەم هەفتەیە بۆ رووداو نێردراون، بەو دیمەنانە بێت عەفرین پڕ بووە لە کەمپ و کۆمەڵگەی نیشتەجێبوون بۆ عەرەب و تورکمانە هاوردەکان.
لێکۆڵینڤانێکی خەڵکی جندرێس قسەی لەسەر نیشتەجێکردنی عەرەب و تورکمانی هاوردە بۆ رووداو کردووە و دەڵێت، سەرانسەری عەفرین بووەتە کەمپ و کۆمەڵگە بۆ نیشتەجێکردنی هاوردەکان.
زۆرینەی خێزانەکانی چەکدارانی ئۆپۆزسیۆنی سووریا لەگەڵ عەرەب و تورکمان هاوردەکانیش چوونەتە نێو ئەو ماڵانەی کە خەڵکەکەی ئاوارە بوون.
بە پێی زانیارییەکانی رووداو کە لە چەند سەرچاوەیەک لە عەفرین وەریگرتوون، 10 کەمپ لە ناحیەی ماباتا هەن و تێیاندا 875 خێزانی هاوردە نیشتەجێکراون. چوار کەمپ لە ناحیەی بلبلێ دروستکراون و 450 خێزانیان تێدا دەژین. هەروەها لە ناحیەی شەرا 7 کەمپ دروستکراون. هاوکات لە سێ کۆمەڵگەیان هەزار و 600 خانوو بۆ نیشتەجێکردنی هاوردەکان دروستکراون.
رێکخراوە کۆمەکبەخشەکانی فەلەستین، کوێت و قەتەر هەشت کۆمەڵگەی نیشتەجێبوونیان لە عەفرین دروستکردووە.
د. وەلید شێخۆ، سیاسەتڤان و لێکۆڵینڤانێکی خەڵکی شارۆچکەی جندرێسە لە عەفرین بەدواداچوون بۆ دۆخی دەڤەرەکە دەکات. ئەو بە کورتی و بە کوردی رووداوی گوت، سەرانسەری دەڤەری عەفرین بووەتە کەمپ و کۆمەڵگە بۆ نیشتەجێکردنی هاوردەکان.
بە گوتەی سەرچاوە خۆجێیەکان جگە لە کەمپ و کۆمەڵگەکان. لە سەرجەم شار و شارۆچکە و گوندەکانی عەفرین، خێزانی چەکدارانی ئۆپۆزیسیۆنی سووریا و عەرەب و تورکمانە هاوردەکان لەنێو ئەو ماڵانە نیشتەجێبوونە کە خەڵکەکەی لە دوای هێرشی تورکیا ئاوارەبوونە. بەگوتەی ئەو سەرچاوانە ئێستا لە هەندێک گوند ژمارەی عەرەب و تورکمانی هاوردە لە دانیشتووانی رەسەنی ناوچەکە زیاترن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ