رووداو دیجیتاڵ
میدیای فەرمیی سووریا دەڵێت، چەند چەکدارێکی نەناسراو لە رێگەی سەرەکیی نێوان دیمەشق و سوەیدا تەقەیان لە پاسێکی نەفەرهەڵگر کرد، لە ئەنجامدا لانیکەم دوو کەس کوژران و چەند کەسێکی دیکەش بریندار بوون.
رۆژی سێشەممە 28ی تشرینی یەکەمی 2025 ئاژانسی هەواڵی فەرمیی سووریا بڵاویکردەوە، "پاسێکی نەفەرهەڵگر لە رێگەی دیمەشق – سوەیدا لەلایەن ژمارەیەک چەکداری نەناسراوەوە تەقەی لێکرا، کە بووەهۆی کوژرانی دوو کەس و برینداربوونی ژمارەیەک کەسی دیکە."
سەرچاوە خۆجێییەکان لە سوەیدا دەڵێن، سەرجەم سەرنشینەکانی نێو پاسەکە درووز بوون و کوژراوەکانیش ژن و گەنجێک بوون.
تەممووزی ئەم ساڵ شەڕ لە پارێزگای سوەیدای زۆرینە درووز لەنێوان گرووپە چەکدارە خۆجێییەکانی درووز و هۆزە دەشتەکییەکانی ناوچەکە دروستبوو، دواتر هێزەکانی سەر بە حکومەتی دیمەشق دەستوەردانیان کرد بۆ پشتگیریکردنی چەکدارە دەشتەکییەکان.
لە مانگی ئەیلوولدا حکومەتی سووریا پلانێکی راگەیاند کە لەلایەن ئوردن و ئەمریکاوە پشتیوانی دەکرا. ئامانجی سەرەکی پلانەکە گێڕانەوەی ئارامی و لێپرسینەوە بوو لەگەڵ "ئەوانەی هێرشیان کردبووە سەر هاووڵاتیانی سڤیل" لە سوەیدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ