رووداو دیجیتاڵ
هاوسەرۆکانی دەم پارتی دەست بە سەردانکردنی پارتە سیاسییەکانی تورکیا دەکەنەوە.
2ـی ئاداری 2025، ئەنجوومەنی سەرکردایەتیی دەم پارتی سەبارەت بە بانگەوازی عەبدوڵڵا ئۆجەلان، رێبەری زیندانیکراوی پەکەکە کۆبووەوە و بڕیاریدا دەست بە سەردانکردنی پارتە سیاسییەکانی تورکیا بکەنەوە.
لەو چوارچێوەیەدا شاندی دەم پارتی کە لە هاوسەرۆکانی پارتەکە و ژمارەیەک پەرلەمانتار پێکدێن، کاژێر 10:00ـی بەیانی رۆژی 10ـی ئادار لەگەڵ پەرلەمانتارانی پارتی رەنجدەران لە پەرلەمانی تورکیا کۆدەبنەوە و هەمان رۆژ کاژێر 13:00 سەردانی بارەگای سەرەکیی جەهەپە دەکەن و لەگەڵ ئۆزگور ئۆزەل، سەرۆکی ئەو پارتە کۆدەبنەوە.
شاندی هاوسەرۆکانی دەم پارتی کاژێر 11:00ـی رۆژی 12ـی ئادار لەگەڵ پەرلەمانتارانی پارتی کرێکاری تورکیا TİP لە پەرلەمانی تورکیا کۆدەبنەوە و دواتریش سەردان و کۆبوونەوەی دیکەیان دەبێت.
4ـی مانگ، سری سورەییا ئۆندەر، ئەندامی شاندی دەم پارتی رایگەیاند، داوای کۆبوونەوەیان لەگەڵ رەجەب تەیب ئەردۆغان، سەرۆککۆماری تورکیا کردووە و چاوەڕێی وەڵامن.
1ـی تشرینی یەکەمی ساڵی رابردوو، هەنگاوێک لەلایەن حکومەتی تورکیاوە بە ئاراستەی پرسی کورد نرا و داوا لە دەم پارتی کرا دیدار لەگەڵ عەبدوڵڵا ئۆجەلان بکات.
شاندی دەم پارتی سێ جار سەردانی ئۆجەلانی لە ئیمرالی کردووە و لەسەر زاری خۆیەوە پەیامەکانی ئەویان بە رای گشتی راگەیاند.
رێبەری زیندانیکراوەی پەکەکە پەیامێکی بە شاندی دەم پارتیدا ناردە دەرەوەی زیندان و ئەوانیش لە 27ی شوبات پەیامەکەیان خوێندەوە.
ئۆجەلان داوای کرد، پەکەکە چەک دابنێ و خۆی هەڵبوەشێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ